أشرف زكي: «بعض الفنانين حدفوا مكتبي بالطوب وهتفوا ضدي وقت أزمتي»
كتب: شروق خالد
كشف الدكتور أشرف زكي، نقيب المهن التمثيلية، عن مساندة بعض الفنانين له في أوقات الشدة، وكذلك تعرضه للهجوم من آخرين وقت رئاسته لجهاز السينما.
وأوضح "زكي" بقوله: "جالي تلفونين، الأولاني، لقيت أحمد عز بيكلمني، بيقول يا أشرف إنت فين؟ عايز أشوفك آخد رأيك في حاجة معروضة عليا تقولي آه أولا، قعدت جنبه في العربية، مد إيده جاب شنطة مليانة فلوس، قالي والله من خيرك، قولتله يا أحمد مستورة، قالي والله من خيرك".
وتابع: "الموقف التاني، أنا عندي بنتين، مايا ومريم، وكانوا صغيرين، بيفتحوا التليفزيون يلاقوا أبوهم بيتقطع من مين، من ناس كانوا بيجبلوهم الشاي والقهوة والأكل، ياريتهم أغراب".
واستطرد: "فجأة الباب بيخبط تفتح بنتي مايا الباب تلاقي أحمد السقا قالها مايا أنا جايلك مخصوص، قالتله خير قام موطي على الأرض قالها جزمة أبوكي بتمن واللي يمسه أموته ولا أتردد في إني أموته، ده أستاذي وأبويا وأخويا وكل حاجة في حياتي، دي مواقف مش ناسيها".
وروى نقيب المهن التمثيلية عن تعرضه لهجوم وطعنات من بعض زملاءه وذلك منذ عشر سنوات، وقت توليه رئاسة جهاز السينما بقوله: "زمايلي اللي واكلين في بيتي، وقفوا تحت جهاز السينما يهتفوا ضدي، ويحدفوا مكتبي بالطوب، الطعنات كانت كتيرة قوي من أقرب الناس للأسف بعضهم انقلب 360 درجة، وكأنه معملش حاجة ومش عايز يعتذر أو يقول أنا كنت غلطان عادي هم مش بيتعاملوا معايا، بيتعاملوا مع الكرسي"، وجاء ذلك خلال استضافته مع الإعلامية بسمة وهبة في برنامج "العرافة" عبر قناة المحور.
