بعد القبض عليه.. زوجة عصام صاصا: التريند خلاكم ماتشوفوش الحقيقة.. أنا جوزي مظلوم

علقت جهاد ماهر، زوجة مطرب المهرجانات عصام صاصا، على قضية دهس زوجها لأحد الأشخاص على الطريق مما أدى إلى وفاته، والتي انتهت بالقبض عليه اليوم السبت.

وكتبت جهاد عبر استوري على حسابها الشخصي بموقع انستجرام: "أكتر حاجة تعباني أني حاولت في الأول أدافع عن عصام أنه مظلوم بس التريند خلاكم متشوفوش الحقيقة ودلوقتي بتقولوا حرام دا مظلوم ليه بيحصل فيه كدا، مش طالبة حاجة غير أن ربنا يرجعه لابنه وبيته".

وأضافت: بس على فكرة محدش قبض على عصام زي الأخبار ما بتنزل، عصام هو اللي نزل عشان القضية بكرا، وكان عامل الفيديو قبل ما ينزل عشان مش عارف هو هيحصل ايه معاه في الجلسة.

 
وكان نشر عصام صاصا مقطع فيديو، عبر حسابه بموقع فيسبوك، قال فيه: أنا دلوقتي نازل بلدي وممكن يكون هذا الفيديو أخر فيديو ليا، وعاوز أتكلم معاكم في حاجات مهمة، ممكن تجرى لي حاجة، وممكن أتاخد في المطار، أنا عاوز أفهم الناس ايه اللي حصل معي بالظبط علشان الناس مش فاهمة حاجة، أنا كنت راجع من شغلي رايح أجيب ابني أعمله عقيقة أفرح بيه، وأنا راجع في نص الدائري بالظبط ماسك نص الطريق، هو الله يرحمه ويحسن إليه أنا مخبطتوش من على الرصيف زي ما الناس بتقول والخبطة كانت على الشمال مش من اليمين.