أحمد السبكي يكشف مصير «الملحد»: مشكلته بسيطة وهيتعرض

كشف المنتج أحمد السبكي عن مصير فيلمه "الملحد" والذي يواجه مشكلة في عرضه رغم حصوله على موافقة من الرقابة على المصنفات الفنية.

وقال أحمد السبكي في مداخلة هاتفية مع برنامج "حديث القاهرة" عبر قناة "القاهرة والناس": "فيلم "الملحد" بإذن الله هيتعرض ومفيش أي مشاكل، مشاكله بسيطة جدا".

وتابع أحمد السبكي: "أنا نزلت فيلم لأحمد حاتم اسمه "العاشق" مكسر الدنيا وهو في الترتيب كان هينزل قبل فيلم "الملحد"، وهنزل فيلم "بضع ساعات في يوم ما" دي رواية لمحمد صادق بطولة هشام ماجد وهنا الزاهد ومي عمر وأحمد السعدني ومحمد سلام ونجوم كتير، إحنا بنحضره ينزل قبل "الملحد".

وأضاف أحمد السبكي مؤكدا أن فيلم "الملحد" حصل على كل التصريحات قائلا: "قولنا قبل كده إحنا أخدنا تصريح من دكتور خالد عبد الجليل ومعانا موافقة الرقابة على السيناريو، مفيش عمل بيبدأ تصويره من غير موافقة الرقابة على السيناريو، الرقابة حرة أنها توديه لأي جهة لو في أي حاجة فيه تخص جهة معينة، وبعد التصوير بتيجي اللجنة اللي قرأت السيناريو للمشاهدة، ودا حصل فعلا في "الملحد" وأضافنا حاجات، والدكتور خالد عبد الجليل شافه أكثر من مرة".

وعن سبب تأجيله بعد تحديد موعد لعرضه: "حصل شوشرة على السوشيال ميديا واللي بيقول أرفع قضية على أحمد السبكي وإبراهيم عيسى، يرفع عايزين يرفعوا قضايا على حاجة مشافوهاش عملوا شوشوة فالدكتور خالد قالي إيه رأيك نأجل الفيلم، فنزلت فيلم "عاشق" والحمد لله عامل إيرادات كويسة، وهبتدي أحدد ميعاد لفيلم "الملحد" بعد كده".

فيلم "الملحد" من بطولة أحمد حاتم، محمود حميدة، صابرين، شيرين رضا، تارا عماد وغيرهم ومن إخراج محمد العدل وتأليف إبراهيم عيسى.