محمود سعد يرد على منتقدي حديثه عن والده: بسببه بقى عندي جهل بمشاعر الأبوة

رد الإعلامي محمود سعد، على منتقدي حديثه عن والده الذي اتهمه خلاله بأنه كان يعامله بقسوة، قائلا: لا والله، أنا عملت ده مش بغرض إن أنا استعطف حد ولا حاجة، أنا راجل عجوز دلوقتي مش عايز حنان أب ولا حاجة خلاص وقولت بدل المرة ألف مرة أنا مش غضبان من أبويا بس عندي سؤال مالوش إجابة.

وأضاف سعد، عبر إنستجرام:وبحكي ده علشان شايف نسب طلاق عالية جدا وشايف معاملة من الآباء لأولادهم بعد الطلاق بيبقى فيها قسوة شوية، الولاد مالهمش ذنب خالص، فأنا حكيت بالغرض ده.

وتابع: إنما الناس اللي هاجموا على عيني وراسي عندهم حق، واحد بيقول إن أبوه أذاه وحرمه من حاجات كتير وخلاه عنده جهل بمشاعر الأبوة، تزعلوا من الكلام، أنا محترم ده جدا، اللي زعل على عيني وراسي واللي استفاد على عيني وراسي، أنا مش بعمل كده علشان أرضي حد، أنا بعمل علشان حاسس إن ده ممكن يكون مفيد لحد.

أردف: «فيه حاجات في الحياة مفيش مانع أبدا إن إحنا نختلف، كل واحد بيشوف الحاجات من زواياه الخاصة، أنا قولت عيب إن أنا أقول سامحت أبويا لأن أبوك أعلى من إن أنت تسامحه، أبويا في ذمة الله وبدعيله، لكن في سؤال بيطاردني، ليه واحد يتجوز واحدة ويخلف 3،4 عيال وبعدين انفصل عنها، من حقه».

واختتم: إنما الواد بقى اللي في النص ده يروح فين؟ يروح مع أمه كويس، طيب مين يصرف عليه؟ يقولها اصرفي أنتي عليها ويروح هو يتجوز.. دي حاجة لازم تتصلح في المجتمع.