عمرو أديب: الأيام الجاية في حاجات مهمة هتحصل لازم نستعدلها

علق الإعلامي عمرو أديب، على الأخبار والشائعات التي انتشرت في مصر خلال الأسبوعين الماضيين، واصفًا الأمر بالمزعج، قائلا: «إحنا بقالنا 15 يوم في دوامة الأخبار ونفيها، أنا معرفش دولة في العالم فيها كل هذا الكم من الأخبار بهذا التنوع والقوة».

وأضاف أديب، خلال برنامجه «الحكاية»، عبر قناة «mbc مصر»: «كل دولة بيكون عندها مشكلة واحدة في الأسبوع، خبر واحد، جدلية واحدة أو اثنين، إنما مش 10 ولا 15، في الأيام اللي فاتت في 15 واقعة كلهم في جدل من أول أسد قصر النيل لغاية السفينة وغيره».

وتابع: «كل هذه الأشياء تضعك في دائرة جهنمية لا تنتهي، مش بقول إن الحاجات دي مش مهمة أو إنه لا يجب متابعتها، لكن الهدف الرئيسي في هذه الدولة إنت مش واخد بالك منه، الأيام الجاية مهمة جدًا، في أشياء مهمة جدًا لازم تتعمل ولازم تستعد لها».

وأكمل: «الدولة ومصر كلها كل يوم عندها كرة ملتهبة بتحاول إنها تفسرها أو تثبتها أو تنفيها، هذا الأمر مزعج، ولو استمر كده هيبقي مزعج أكثر».