«بربيهم لله».. زينة تكشف تفاصيل علاقتها بابنيها التوأم زين وعز الدين

كشفت الفنانة زينة عن تفاصيل علاقتها بابنيها التوأم عز الدين وزين الدين.

بني آدم واتقسم نصين.. زينة تتحدث عن ابنيها التوأم

وقالت «زينة» في برنامج «ABtalks»، تقديم الإعلامي أنس بوخش: «كل واحد فيهم واخد حتة معينة غالية أوي، وكل واحد ليه حتة مش، الاتنين نفس الحتة، متساويين في الغلاوة بس بشكل مختلف، بحس إن هما بني آدم واتقسم نصين، نص أنا ونص مش أنا بس بحبه».

وتابعت: «النصين عندي بيخلوني أقعد افكر كتير، أنا كنت فاكرة في الأول إن أنا شخصية مهمة بس لما كنت بقعد لوحدي بحس إني ولا حاجة، بس من ساعة ما خلفت ولحد دلوقتي أنا طول الوقت حاسة إني حاجة كبيرة أوي لأني أم للاتنين دول، كنت حاسة إني ماليش قيمة ولا لازمة، بقى ليا لازمة وبقيت أخاف على نفسي، بخاف على عمري لأن هما محتاجيني».

واستكملت: «هو ده الحب الوحيد اللي بتدي فيه وأنت مش عايز مقابل، أنا مش مستنية منهم حاجة.. ابني ساعات بيقولي مثلا لما تكبري ولما تحتاجي مش عارف إيه يا مامي لازم تعمليلي كذا فبقوله يا حبيبي أنا مش عايزة منك حاجة، قالي طب لو تعبانة؟ قولتله سيبني أنا مش عايزة منك حاجة».

زينة: ممكن اتخانق مع عيال صغير عشان خاطر ولادي

أردفت: «أنا بربيهم لله، بربيهم علشان ربنا وعلشان بحبهم، ربنا حط حب ليهم في قلبي غير طبيعي، أنا مشوفتش حد كده، أنا ممكن اتخانق مع عيال صغيرة علشانهم».

وأشارت إلى أن أكبر خوف في حياتها هو على أولادها، موضحة: «بخاف على عيالي من المرض، صحتهم ضعيفة يعني مش عيال أقوياء علشان اتولدوا 7 شهور، وعندهم نوع أنيميا صعب شوية، وبيلعبوا رياضة على طول بس بيتكسروا بقى».