بسبب أزمة مالية.. محمد جمعة: كنت هفقد ابني لولا مساعدة هذا الفنان

كشف الفنان محمد جمعة، عن أسرار في حياته الشخصية، والمواقف الصعبة التي تعرض لها في بدايته ومنها تعرضه لأزمة مالية مر بها كاد بسببها أن يفقد ابنه.

وقال محمد جمعة خلال لقائه في بودكاست "فايق ورايق": "قعدت أنا ومراتي 5 سنين ما نخلفش وكان الحل إننا نعمل حقن مجهري فالمشكلة بقى إن كان لازم مراتي تاخد كل يوم حقنتين تثبيت، طبعا بعيدا عن شقائها الحقنتين دول كانوا في اليوم بـ250".

وتابع محمد جمعة: "بتدفع 250 جنيه لمدة تقريبا 6 شهور يوميا، ربنا كان بيبعت، فجأة مراتي مفيش غير حقنة واحدة وأنا مفيش مليم وأنا من الناس اللي ما بعرفش استلف، عيطت عياط لا يمكن حد يتخيله لأن الأمل اللي بتحلم بيه بيضيع قدامك لأن أنت عاجز أنك توفر 250 جنيه عشان تجيب حقنة".

وتابع محمد جمعة ليحكي عن مساعدة زميله الفنان حمزة العيلي له قائلا: "اتصلت بصديق ليا اسمه الفنان حمزة العيلي معرفش إيه اللي خلاني أكلمه قلت له بص يا حمزة أنا الوضع كذا كذا وأنا حرفيا دلوقتي مفيش في جيبي مليم، قالي إنت فين كنت وقتها ساكن في حدايق الأهرام، قالي تعلالي دلوقتي حالا روحت ليه وفاكر عمري ما هنسى أخدت منه 1500 جنيه وإلى وقتنا هذا بقول لحمزة إنت ليك في عمر ابني، دا موقف مش بنساه ليه".