بعد تصريحاته عن رفضه دور شاذ في عمل له.. محمد سامي يرد على طارق لطفي: كلامك مختلق وغير صحيح

رد المخرج محمد سامي، على الفنان طارق لطفي، بعد حديث الأخير عن رفضه دور شاذ في مسلسل "كلام على ورق"، مؤكدا أن تصريحاته غير صحيحة ولا علاقة لها بالحقيقة.

ووجه سامى عبر حساباته الرسمية على مواقع التواصل الاجتماعي رسالة توضيحية حملت عتاب لطارق لطفي، وتكذيب أيضا لما ردده حول سبب رفضه للدور، قائلا: "رداً علي كلام طارق لطفي المنتشر اليومين دول.. أولاً طارق ممثل محترم وإنسان جميل واشتغل معايا مرتين، مرة في مسلسل "مع سبق الإصرار"، ومرة تانية في مسلسل "حكاية حياة"، وأعتقد الدورين كانوا مهمين ومحترمين جداً وحقق فيهم نجاح مهم، بعدها عرضت عليه دور في مسلسل "كلام علي ورق" وحصل خلاف إنتاجي علي الأجر تقريباً وعلي مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة ٢٠١٤ يعني من ١١ سنة".

وأضاف: "فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسياً وبدأ يتكلم عن المجتمع والناس وخوفه علي الجمهور وكلام غريب جداً بحاله من المبالغة والاسترسال لكسب ود الجمهور واللعب علي الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه، و الدور مش دور شاذ ولا ليه علاقة بالشواذ!!".

وتابع: "مش فاهم طارق قال كده ليه واخترع الموضوع ده إزاي و كمان عمل حكاية غريبة جداً أنا مش فاهمها وإنه خاف علي عيلته وأسرته وطلعني بروج لشئ غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك".

واستكمل: "ومع إحترامي ليك يا طارق كلامك مختلق وغير صحيح والدور موجود ينفع الناس تشوفه وكان حسين الإمام رحمة الله عليه طالع بيحب روجينا و هي حبيبة عُمره و أنتيمه ماجد المصري وأحمد زاهر وأشرف زكي. 

وتابع: "وكان جدع مايع عشان أمه رقاصة و صاحب كباريه وده اللي كان عاجبك في الدور وعملت معايا بروڤة آداء عليه وعلي مياعته وكان عاجبك، راجع نفسك يا صديقي قبل إلقاء قنابل تزعل زميلك منك، و معلش إني رديت بالشكل ده ولكن لا بد من الرد للتوثيق، كلامك كان لازم يترد عليه و كل سنة وانت طيب وأسرتك الكريمة بخير ولو انت ترفض تقديم دور الشاذ فأنا قبلك أرفض أخرجه!!"