«كنت هعتزل الفن وتعبت نفسيا».. نادية الجندي تكشف كواليس منع «خمسة باب» من العرض

كشفت الفنانة نادية الجندي عن أسباب منع عرض فيلم "خمسة باب" مع النجم عادل إمام، مؤكدة أنها كانت سوف تعتزل الفن بعد وقفه لمرورها بحالة نفسية سيئة.

وأوضحت "الجندي" بقولها: "فيلم "5 باب" اتوقف بفعل فاعل، وكان فيه مكيدة مدبرة علشان يتمنع من دور العرض، لأن إزاي عادل إمام ونادية الجندي والعظيم فؤاد المهندس يجتمعوا في عمل واحد".

وتابعت: "الفيلم كان اتعرض 10 أيام في دور العرض والأمن المركزي نزل في ميدان الأوبرا من الخوف لأن كان هيحصل ثورة على الفيلم من الزحام والجماهير لأنه كان مكسر الدنيا، وبعد ما نشوف نجاح العمل لقينا وزير الثقافة وقتها راح مضلم الدنيا، وده تعبني نفسيا وقتها قلت مش هشتغل ولا همثل تاني".

واستطردت: "تعبت نفسيا لأن دي قضية كرامة وفيه ظلم وقع عليا بوقفه من العرض، إزاي أكون أخدت 5 تصريحات من الرقابة ومشيت في الطريق القانوني ويجي وزير الثقافة وقتها يمنعه علشان كده قررت وقتها اعتزال التمثيل".

واختتمت نجمة الجماهير بقولها: "المخرج أشرف فهمي كان جايبلي فيلم "الخادمة" قلتله مش هشتغل تاني خالص بعد وقف "5 باب" وهبطل تمثيل، فقال لى إنتى تاريخ ومتخليش حدث زي ده يوقف مسيرتك وحفزني إنى أرجع تاني وفعلا نزلت صورت "الخادمة" وكسر الدنيا وحقق نجاح محصلش على المستوى الجماهيري والنقاد"، وجاء ذلك خلال استضافتها مع الإعلامية ياسمين عز في برنامج "كلام الناس في رمضان" المذاع على قناة "إم بي سي مصر".