بعد قرار اعتزاله.. فريدة سيف النصر تقدم رسالة لمحمد سامي: هي خناقة مدرسة

وجهت الفنانة فريدة سيف النصر رسالة للمخرج محمد سامي، بعد قرار اعتزاله الدراما التلفزيونية، وطالبته فيها بالعودة مرة أخرى وعدم الاعتزال، مؤكدة أنه مخرج موهوب، كما أشادت بأعماله في موسم رمضان 2025.

وجهت الفنانة فريدة سيف النصر رسالة للمخرج محمد سامي، بعد قرار اعتزاله الدراما التلفزيونية، وطالبته فيها بالعودة مرة أخرى وعدم الاعتزال، مؤكدة أنه مخرج موهوب، كما أشادت بأعماله في موسم رمضان 2025.

كتبت فريدة سيف النصر عبر حسابها على«فيسبوك»: «أرجع عن قرارك يا سامي.. بصوا أنا ماعرفش إيه اللي بيحصل لأني حقيقي مش مختلطة خالص..تقدروا تقولوا شغلي بيجي من الله بلا حول لي واتقنه كما أمرني وأروح بيتنا والباقي على الله ولذلك حقيقي ماليش في أي كواليس وشلل وقعدات عزومات مهرجانات خيانات وخد وهات وأبوك السقا مات زي الببغاء مابيقول».

فريدة سيف النصر لـ محمد سامي بعد اعتزاله: هي خناقة مدرسة اتقمص وأغير مدرستي

تابعت: «ولذلك في إيه ياعم سامي هي خناقة مدرسة على الساندويتشات واتقمص وأجري وأغير مدرستي.. اللي بيحب شيء بيحارب علشانه في إيه.. لو أي غلط أنا متعرفوش يتغير يتصلح لكن ما أخسرش فنان من نوع خاص الفنون جنون...وللعلم كل مانحب نتكلم نقول بلطجة، نقدكم نفسه علشان بتملكوا ورقة وقلم وبرامج بلطجة على أي مبدع.. إنك تقطع عيشي بلطجة.. إنك تعمل عليا مؤامرة بلطجة.. أن إنتاج يقولك كتير على تلاتة تعريفة بتاخدهم ويدي بمزاجه ضيوف عندك ملايين بلطجة، لما يكون جمهورك قد الدنيا وتقعد في بيتكم بلطجة.. لما يقولك توزيع يعني بيوزعوك أنت لأنك مسمع من المحيط للخليج.. دوول قعادهم هو البلطجة وبمزاجهم مش زي الناس ماعايزة».

وقالت: «خليك محارب.. fighter ..worior مقاتل، ده شغلك موهبتك من الله أنا كده ومابسكتش على الحق.. بص إحنا ماتفقناش خالص في جعفر العمدة لكن عديناها باحترام لبعض لفنك ولفني..مع المحترم الدبلوماسي رمضان.. لكن مش بمزاجك تبعد ولا بمزاجي أسكت لا والله لأنك فنان.. بكل حاجة سيئة أو حلوة هايقولوها عنك. كلنا خطائين..أنا والله ماعرفت في ايه..لكن البوست صعب».

فريدة سيف النصر: «محمد سامي عارف يجيب الناس وده بيقهر»

تابعت: «توليفتك الذكية من أعمال زمان والناس بتحب إيه دي مضايقة البعض، أنت بدأتها من ملك الترسو فريد وخناقاته ونجاحها وأي حبكه دراميه موجوده في القديم وفي الحياه مشكلتك فاهم تجيب الناس ازاي وده بيقهر خدها مني أنا خبره.. اللي يقول بقي عصبي كل المصريين عصبيين من الضغوط وعلي بعض من التعليقات الغل والحقد وكتير اتغيرنا..هايقولوا بيشجع المشاكل انزلوا أي حته كلهم مشاكل اتجننوا وللعلم الخناقات من زمان في كل أفلام العالم ماخترعنهاش..من اول ما دخلوا بروس لي وفاندام ما خلصنا.. أمي الله يرحمها كانت بتقول ..أن كرهتوهم ماتفتروش عليهم.. مش بمزاجك تجري واجه نعرف غلطنا ونصلحه».

فريدة سيف تشيد بـ«إش إش» و«سيد الناس»

واصلت: «وللعلم مسلسل إش إش تحفه..ماجد المصري وادوارد وايهاب عملوا مشاهد عالمية..طبعا مي تتحب مالهاش حل كلهم والله على الفرازة يعني بتعرف تحط مين فين، وسيد الناس حلو أوي سيبك بقى من أعداء النجاح في عيوب أداء بقى صوت ماعرفش إيه عالي..هو المفروض في جو التوتر العائلي ده يتكلموا على الهادي وضوء شمع ومزيكا بيانو ولا إيه..هو أي هبد..والممثلين تحفة.. ولما حضرتك تمشي ده حل وكمان مي ذنبها إيه تسيبها ولا هاتاخدها ولا مالكم».

فريدة سيف النصر عن محمد سامي: «مخدتش حقي في جعفر العمدة وقولت مش هتشغل معاه»

استطردت: «بصوا أنا فنانة بقلبي وكياني ومافيش حاجه اسمها خليك في حالك وامشي جنب الحيطة، لا أنا برا الحيطة والصندوق والحق حبيب الله.. من الآخر حد يقولي أن ابني يغلط اطرده ولا أنصحه واوجهه ..كل ده وأنا مش فاهمه ليه قسما بالله..كل اللي هاقوله.. سامي مش بمزاجك ومش هانتفرج على الموهوبين بيهربوا نسيبها لمين.. مانقعد نقول واحد اتنين تلاتة كذا.. الله اكبر، وعلى فكرة أنا قائلة كذا مرة مش هاشتغل معاه.. مش علشان حاجه غير اني ماخدتش حقي في جعفر العمدة واتكتمت أنا مابحبش المشاكل بالم نفسي وأغني لثومه..ومش هاتعود ولو أن الشوق موجود وحنيني إليك موجود أهي غلطة.. أنا مبدئي الحظ يجي مرة لو كسرتهولي ماعرفش الحم. بحب الجديد ..وباعشق شغلك فاهم بتعمل ايه لكن زحمة الناس باعذرك عليها».

اختتمت: «أرجع عن قرارك لو سمحت أنت خسارة ومي خسارة وكل النجوم اللي معاك دول بجد طلعت فيهم ومنهم العظمة كلها..كفاية رغي بقي وسيبولنا ابنكم كلموه شوفوا الغلط فين ونصلح ..ويابخت من قدر وعفا ياعم سامي.. فين العيب بقي..فهموني..وعجمي».