انفراد العاصمة.. المخرج محمد سامى يسافر إلى دبي لتأسيس شركة إنتاج سينمائي كبيرة

يستعد المخرج محمد سامي للسفر إلى دولة الإمارات العربية المتحدة، وبالتحديد إلى دبي لإنشاء شركة إنتاج سينمائي يكون مقرها دبي، حيث يستعد في الفترة القادمة إلى إدارة عدد كبير من الأفلام السينمائية المهمة التي تمس قضايا مصر والشرق الأوسط.

كما علمت "العاصمة" أن تلك الأفلام ليست بالضرورة أن تكون من إخراجه هو، ولكن سوف يتشارك فيها مع مخرجين آخرين.

وجدير بالذكر أن المخرج محمد سامي تعرض لهجوم شديد في الفترة الأخيرة، بسبب ما قيل عن مسلسلي "سيد الناس" و
"اش اش" وانهما يقدمان الشخصية المصرية بشكل مسيء.

وقد أعقب ذلك بالاعلان عن اعتزاله الدراما التلفزيونية والاستعداد لمشروع جديد، حيث أصدر محمد سامي بيانًا كتب فيه:""وداعا الدراما التليفزيونية، السنة دى كانت آخر أعمالى التليفزيونية، واللى فيها بودع المسلسلات، رحلة طويلة حولى 15 سنة، قدمت فيهم كل اللى قدرت عليه لإسعاد الجمهور العربى، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعنى، سواء بردود الأفعال أو بتصويته ليا فى الجوائز، وأى نجاح حققته كان بفضل ربنا والجمهور، يمكن المقربين ليا عارفين إنى واخد القرار ده من فترة وهو اعتزال الإخراج التليفزيونى، ولكن كنت بنتهى من التزامات موقعة مع شركات ونجوم والحمد لله انتهيت منها وكان آخرها 2025، معنديش حاجة أكتر أقدر أقدمها فى التليفزيون، وخايف من تشبع الجمهور من أسلوبى ومن الوقوع فى فخ التكرار ودائرة المتوقع والملل، والوحيد القادر على الدوام هو الله وحده".

وأضاف المخرج محمد سامى: "الحمد لله آخر عملين ليا إش إش وسيد الناس حققوا نجاح أنا سعيد بيه، كل يوم بلدى العظيمة مصر بتطلع صناع جداد موهوبين ومثقفين ويقدروا يقدموا أفضل من اللى قبلهم وهنفضل طول الوقت بنقدم أعمال مصرية يلتف حولها الجمهور العربى، بشكر كل حد ساعدنى فى الرحلة وبشكر كل زميل منافسته كانت دافع للتميز، بعتذر عن أى مشهد قدمته أثناء الرحلة ولم يلقى استحسان الجمهور أو إعجابهم فى الآخر الفنان دايما بيجرب والفنون جنون زى ما بيقولوا، ادعولى الفترة الجاية عندى سفر خارج مصر لفترة عامين بتعلم فيهم حاجة جديدة بدرسها، حاجة كان نفسى أتعلمها من زمان وأجلتها كتير لحد ما لقيت نفسى بكبر وخايف يفوت العمر قبل ما أعمل حاجة نفسى فيها، مقتنع إن الشخص يقدر فى أى وقت يقرر يوقف حاجه بيحبها عشان يعمل حاجة تانية بيحبها برضه وعايز يجربها بس محتاج عيلة تسانده على اتخاذ قراره، كل التوفيق لكل زمايلى وبحبكم وبشكركم على سنين المنافسة الجميلة اللى عملت أسمائنا كلنا وأتمنى لنفسى التوفيق فى الخطوة الجديدة".