عبير الشرقاوي تهاجم مسلسل «بطلوع الروح»: «تناول المسلسل غبي.. ومطلعين داعش بيشربوا خمرة»
كتب: نورهان طلعت
هاجمت الفنانة المعتزلة عبير الشرقاوي صناع مسلسل "بطلوع الروح" بكلمات حادة مما أدى إلي تعرضها لهجوم حاد من قبل متابعيها وأشخاص من الوسط الفني.
وكتبت "الشرقاوي" عبر حسابها الخاص بـ"فيس بوك"، مهاجمة صناع المسلسل، وقالت:"أسرة مسلسل الهبل بطلوع الروح، التناول غبى مش معقولة نطلع الناس بتوع داعش خاينين وبيرتشوا وبيشربوا خمرة دول ناس بيعتبروا نفسهم مجاهدين فى سبيل الله و مستعدين للموت في أي لحظة".
وأضافت :"إحنا عارفين إنهم على باطل آه بس هما مش عارفين هما بيعتبروا نفسهم المسلم الحق و أى حد جنبهم مسلم ناقص فمش معقولة نطلعهم بيشربوا خمرة إيه الهبل ده، بقى معقولة البطل إللى بيعتبر نفسه مجاهد عنده غزوة تانى يوم وممكن يتقتل و هو عارف كده يروح يجيب خمرة و يشرب هو و مراته، إرحمونا يا هبل خسارة الفلوس والله".
وأثار انتقادها الحاد لصناع "بطلوع الروح" جدلاً كبيرًا وقيام البعض بالرد عليها، حيث رد المؤلف عمرو محمود ياسين عليها قائلاً: "اسمح لي اختلف معاكي بنيتي الفكرة ع انه الخمره حرام في الإسلام فمستحيل الدواعش يشربوا الخمر.. طيب وهو حرق الأسرى مش حرام في الإسلام ؟ هو قتل النفس التي حرم الله قتلها، إلا بالحق، مش حرام بالإسلام؟ هو بالإساس إيه الجرم الأكبر؟ القتل والحرق ولا شرب الخمر؟ ممكن تقولي لي هنا لا ماهو ده فهمهم الخاطيء الباطل للدين طيب ليه استبعدتي فهمهم الخاطيء لمسألة شرب الخمر؟ مش يمكن اعتبروا أن الخمر هي ما أخذ من العنب والتمر فقط وماعداه ليس خمرًا؟".
وأضاف: "ثم ليه اعتبرتي كل داعشي هو مسلم مؤمن ولكنه فقط فاهم غلط؟ مش يمكن في دواعش، بيستفيدوا ماديا ؟ مش جايز بينهم منافقين ؟ مش جايز ببنهم مضللين وفي حالة المسلسل، مش جايز هناك من أفتى له بشربها، إذا كان ذلك سيعيد له زوجته تدريجيًا؟ ثم هل هم أنبياء مثلا عشان إنهم مايغلطوش ؟ دول مجرمين غلاظ القلوب إزاي تصورتي إنه مستحيل يضعف امام غرائزه وهو بالأصل مسلم نفسه للشيطان بأفعاله دي ناس بتقتل الأبرياء نساء واطفال وعجائز مستبعده يشرب شوية خمره؟ المشكله الكبرى التي واجهت هذا المسلسل أن بعض الناس تتعامل مع داعش، على إنهم يمثلون المسلمين! و دي مصيبه في حد ذاتها".
