كريم فهمي: زوجتي وقفت جنبي في وقت كان مش معايا فلوس ولا أي حاجة.. و90% من نجاحي راجع لها

تحدث الفنان كريم فهمي، عن علاقته بزوجته دانيا، وتفاصيل تعرفه عليها، متطرقا لعدد من أسراره الشخصية والحياتية، وذلك  خلال حواره مع الإعلامية لميس الحديدي في برنامج "كلمة أخيرة" المذاع عبر قناة ON.

وقال كريم فهمي: "أنا متجوز من 12 سنة، وعندي 3 بنات: كاميلا، ناعومي، وجميلة، ولما اتقدمت لدانيا، كنت رومانسي فعلاً، زي فارس أبو العزم اللي مش ملزق".

أشاد كريم فهمي بزوجته دانيا، مؤكدًا أن دورها في حياته لا يقدّر بثمن قائلا: "دانيا قصة مختلفة تمامًا، لو في حاجة أنا وصلت لها دلوقتي فالنجاح ده 90% بيرجع ليها و10% لي، دي إنسانة وقفت جنبي وأنا ولا معايا فلوس، ولا شقة، ولا عربية، وبنقل من عملي كطبيب أسنان لممثل ومؤلف".

وأضاف كريم فهمي: "مين يتحمل ده كله؟ سنة ورا سنة وإحنا مش معانا غير اللي بناكل بيه، ولما كانت بتتعرض علي أعمال وأرفضها، كانت تقوللي لو مش حاسس الدور متعملوش، وهي بتحبني كمؤلف أكتر مني كممثل".

وتابع: "دانيا بتختار لبسي، وبتقرأ كل أعمالي، هي الجندي المجهول في كل نجاح لي".

كريم فهمي يتحدث عن الغيرة

وعن الغيرة عليه من المعجبات، قال كريم: "أكيد كنا بنغير، هي كانت بتسألني عن مشاهد معينة وهتتصور إزاي، وأنا كمان كنت بغير، بس مع النضج والخبرة الأمور اتغيرت، وكل واحد فينا نضج مع التاني".

وأكمل: "فيه حاجات كتيرة بتختلف من بداية الزواج عن الفترة اللاحقة مع النضج والحياة والخبرات، أنا شخصياً في بداية الزواج مختلف عن الآن، في أول زواجنا لما كان بييجي حد زميلها في المدرسة وأنا معرفوش يسلم عليها كنت بقول قدامه مين ده؟ وكنت بحرجها، مع الوقت الموضوع اتغير ونفس الشيء من عندها كانت أول الزواج بتغير جداً وتسألني أنت هتعمل المشهد ده إزاي؟ دلوقتي الأمور اختلفت".