بعد مطالبته للجيش بإيقاف مشروعاته لخدمة المصريين.. محمد الباز يتقدم ببلاغ للمدعي العام العسكري ضد نجيب ساويرس

علق الكاتب الصحفي محمد الباز ، على تصريحات رجل الأعمال نجيب ساويرس، بشأن إساءته للجيش المصري.

 وقال الدكتور محمد الباز"بلاغ إلى المدعى العام العسكرى ضد نجيب ساويرس لو يعرف نجيب ساويرس يعنى ايه جيش مصر، مكنش اتكلم عنه بالطريقة الصبيانية دى.. لو يعرف معنى إن الجيش المصرى قرر بعد هزيمة ٦٧ رفض أى شكل من أشكال جمع التبرعات عشان المجهود الحربى، وإنه يكون قادر على سد احتياجاته واحتياجات أفراده مكنش هلفط الهلفطة المعتادة بتاعته اللى تقريبا كل ما يلاقى وقت فاضى عنده يقعد يتحفنا بنظرياته السخيفة".

 وتابع: "لو كان يعرف ما يتحمله الجيش فى الدفاع عن أمن البلد دى واستقرارها، مكنش اتريق، تقريبا معتقد إن دمه خفيف، وبيجرب خفة دمه فينا كل شوية.

واستطرد: "الكلام اللى قاله نجيب ساويرس عن الجيش المصرى فى إحدى مقابلاته التليفزيونية يستحق المساءلة، ولأنه أثبت إنه من ذوات الجلد التخين، بيحب الناس تنتقده وتهاجمه وتقول فيه اللى قاله مالك فى الخمر، وهو مبسوط وسعيد، فخسارة فيه الكلام أكتر من كده .

واختتم قائلا: " أنا باتقدم ببلاغ رسمى إلى المدعى العسكرى للتحقيق مع نجيب ساويرس فى اساءته للجيش المصرى".