عمرو سلامة: اتحبست في دور الشخص المثير للجدل.. وبحس إننا ماشيين في حقل ألغام
كتب: نسرين إبراهيم
تطرّق المخرج عمرو سلامة إلى الجدل الذي يحيط أحيانًا بتصريحاته الإعلامية أو تدويناته عبر مواقع التواصل الاجتماعي، موضحًا أن بعض آرائه تُفهم خارج سياقها، مما يؤدي إلى إثارة الجدل أو التسبب في أزمات غير مقصودة.
وقال عمرو سلامة خلال لقائه في برنامج "كلاكيت": "أنا اتحبست في دور الشخص المثير للجدل معرفش ليه مع أن أنا في الحياة مش كده، ومش عارف بقول إيه مثير للجدل للدرجة دي يمكن أنا غلطان معرفش مش المفروض اتكلم وأقول اللي في دماغي زي ما هو بس".
وتابع عمرو سلامة: "أنا فاكر وأنا صغير لما كانوا يقولوا إيناس الدغيدي قالت كذا أو يوسف شاهين قال كذا وخالد يوسف قال كذا وأنا في أوقات كتير بقول هو ليه الناس متعصبة من تصريحاتهم، في أوقات كتير جدا لما بقول حاجة أو يطلع مني تصريح يعمل جدل أو يعمل خناقات أونلاين ساعات بحس أن دا مفيد وساعات لأ أنا مش مستحمله، يعني في أوقات كتير جدا بحس أنه مفيد أننا نفتح موضوع زي دا ونتناقش فيه كمجتمع ونكتشف إيه الصح وإيه الغلط وفي أوقات بحس أن المفروض تعدي ولا حد يستوقفها".
واختتم عمرو سلامة كلامه: "العصر دا مصيبته أنك طول الوقت ماشي في حقل ألغام بتقول أي تصريح في تليفزيون أو برنامج أو على النت ممكن تلاقي نفسك دوست على لغم وأنت مش واخد بالك خالص وأنت فاكر أن الكلام محدش هيقف عنده بتقول اللي جواك زي ما تكون قاعد مع صاحبك على قهوة لكن كل يوم الواحد بيتأكد أن الموضوع فاتورته غالية".
View this post on Instagram
