عصام صاصا: كنت بقرأ قرآن بس الدنيا تلاهي وحبيت الغناء

كشف مطرب المهرجانات عصام صاصا، عن تفاصيل بداياته الفنية، مشيرًا إلى أول أغنية له حصدت عددًا كبيرًا من المشاهدات وحققت له شهرة واسعة.

وقال عصام صاصا في بودكاست "روقان" مع فتحي مصطفى: "أنا صوتي حلو وراثة من أمي، وكنت بقرأ قرآن ولحد دلوقتي بقرأ بس الدنيا تلاهي وغصب عن الواحد، بعدين حبيت الغناء وكنت بسمع أغاني قديمة وحبيت الموضوع، أنا كنت في إعدادي جربت أنا وناس زمايلي في المدرسة كنا بنسجل أغاني وإحنا بس اللي بنسمعها، أول أغنية عملتها مش فاكر اسمها".

وتابع عصام صاصا: "اشتغلت حاجات كتير قبل الغناء كهربائي وسواق توك توك وكل حاجة، أكتر شغل استمريت فيه كان التوك توك وأول أغنية جابت 100 مليون وأنا مكنتش اعرف، البوستر بتاع الأغنية نزل ووشي مش باين عليه محدش كان عارفني ودي كانت بداية نجاحي كانت أغنية "قالك تعيشها تشوف".

أحدث أغاني عصام صاصا

وعلى صعيد آخر، طرح كلا من عصام صاصا وعنبة قبل أيام فيديو كليب "أنا البطل"، من كلمات محمود سوستا، وتوزيع كيمو الديب، والكليب إخراج أشرف رمضان.