محمود سعد يعلق على رسالته لأبناء محمود عبدالعزيز لإنهاء الخلاف مع الإعلامية بوسي شلبي

أوضح الإعلامي محمود سعد السبب وراء توجيهه رسالة لأبناء الراحل محمود عبدالعزيز لإنهاء الخلاف مع الإعلامية بوسي شلبي، عبر حسابه على إحدى مواقع التواصل الاجتماعي دون التواصل معهم بشكل شخصي.

تعليق محمود سعد على رسالته لأبناء محمود عبدالعزيز

وقال محمود سعد عبر حسابه الرسمي على «فيسبوك»: «ردا على التعليقات.. ليه كتبت بوست في قصة أبناء محمود عبدالعزيز مارفعتش التليفون وكلمتهم؟.. هو أنا ماعنديش تليفون لا محمد ولا كريم ده أول حاجة.. بس طبعا كان ممكن أجيبه.. لكن لما بدأت القصة تابعتها زي حضراتكم.. وأنا ماعنديش معلومات أكتر من اللي قاله الناس.. الكلام مش لطيف والتفاصيل دمها تقيل.. الحقيقة إني قلت يعني أنا مش عايز ابقى بضغط عليهم.. أنا بحبهم من وهما صغيرين وهما دلوقتي كبروا وبقوا نجوم وشخصيات كبيرة يقدروا ياخدوا قراراتهم بنفسهم مية في المية.. وأنا ماحبش أبقى وصي على حد.. فلقيت أنه الأسلم أن أنا اكتب كلمتين هم شافوهم ماشافوهمش مش مشكلة».

وأضاف: «في حاجة بتعملها أحيانا مش بتريحك قوي لكن بتحل مشكلة قابلتك.. أنا قابلتني مشكلة أن في تجريح كده وكلام على محمود عبدالعزيز واحنا متفقين كلنا كده أنا وأحمد ومحمود والمجموعة دي أن إحنا ندافع عن بعض.. قلت اكتب كلمتين.. الكلمتين دول أنا حاسسهم بجد انه يا جماعة لموا الحكاية دي.. مش عايزين شوشرة.. كتبت كلمتين هم يعملوا بيها أو ما يعملوش هم مش ملزمين قدامي في حاجة.. لو اتكلمت في التليفون يبقى أنا ألزمتهم بأنه اللي أنا بقوله ده يصح أنهم يعملوه.. لا ماقدرش ألزمهم ولا أحب أن أنا ألزمهم».

واستكمل: «ففوجئت تاني يوم بأن محمد بيدور عليا وجاب تليفوني وكلمني وقعدنا نتكلم كتير.. شكرته على أنه اهتم وهو شكرني على أني اهتميت وكانت مكالمة كويسة.. بس أدي كل الحكاية.. فأنا مش حابب أورطهم خالص.. ولا حابب أدخل في القصة دي لأن ادخل فيه اعمل إيه.. ده خلاف بين الناس على شيء ما، يعني أنا عرفت جزء منه لكن الباقي ما عرفتوش.. فأنا ما اتدخلش».

واختتم: «في حد قال لي قول رأيك بصراحة أقول رأيي في إيه؟ سيدة كانت مرتبطة بمحمود عبدالعزيز وفي مشكلة بينها وبين ولاده.. أنا أقول رأيي في إيه؟ أنا بس أقول يا جماعة لموا الموضوع بلاش شوشرة.. يا جماعة تصافوا مع بعض.. يا جماعة روحوا المحكمة من غير ما تكتبوا في السوشيال ميديا.. فحتى محمد قال لي أنا ما عملتش حاجة خالص غير لما طلع الكلام من الجهة التانية رحت مطلع بيان أنا وكريم وما اتكلمتش خالص.. بس ادي كل الحكاية».