بسبب الإهمال.. تطورات حالة إيمان رياض بعد تعرضها لإصابة خطيرة في مطعم شهير

تخضع الإعلامية إيمان رياض للعلاج المكثف بعد إصابتها بإصابة بالغة الخطورة، إثر سقوطها على سلم أحد المطاعم الشهيرة، نتيجة إهمال في عملية التنظيف، بحسب ما كشفت عنه في تصريحات لها، وهو ما أدى إلى تعرضها لشرخ في العظمة العجزية وارتشاح في الحوض، وأشارت إيمان إلى أنها تخضع للعلاج الطبي لعدم قدرتها على الحركة وقت سقوطها وإصابتها.

إصابة الإعلامية إيمان رياض

وكانت الإعلامية إيمان رياض قد كشفت عن تعرضها لإصابة بالغة أمس، وكتبت عبر حسابها الرسمي على «انستجرام»: «هو طبيعي أن مطعم ولا كافيه يمسح الأرض والسلالم بالصابون والمياه والناس طالعة نازلة على السلم من غير يافطة ولا مثلث التحذير، والغريبة أن مفيش ولا اعتذار ولا أي نوع من الاهتمام، هي الناس وصلت لكدة ازاي وامتى ؟».

وأضافت: «يا حضرات ده أنا وقعت قدامكم ومن شدة الألم أغمى عليا، وبقيت بصوت لأول مرة في حياتي بالمنظر ده، فضلت أكتر من ساعة على السلم مش بتحرك من كتر الوجع والرعب يكون جرالي حاجة في العمود الفقري والنخاع الشوكي، صحابي طلبولي الإسعاف وجت وشالوني قدام الرايح واللي جاي وأنا مش ببطل صويت من شدة الالم، في المستشفى بعد الإشاعات والرنين طلع عندي شرخ في العظمة العجزية وارتشاح في الحوض».

وتابعت إيمان: «اللي يعرفوني عارفين اني انسانة مش بحب القصص الكتير ولا بكتب حاجة عني شخصية لكن بصراحة المرة دي تعمدت أكتب وأمنشن المكان وبشتكي لإدارة المكان اللي تسبب في اللي حصلي وما حاولوش حتى يعتذروا أو يبدوا اهتمامهم بزبائنهم، الأماكن اللي زي دي مش عارفين أن دي مسؤولية وأرواح الناس مش لعبة.. يا حضرات أنا بسببكم مش عارفة أمشي، ستر ربنا مش هيكون فيه تدخل جراحي لكن يجب عدم الحركة، حتى يلتئم الشرخ، لكن أنا مع كل ألم ومع عدم استطاعتي للحركة مش مسامحة المستهترين أصحاب الكافيه بعامل النظافة اللي ما يعرفش يعني ايه نظافة في مكان عام».