بعد أزمة محمود حمدان.. محمد العمروسي يروي موقفًا إنسانيًا لـ أحمد آدم أثناء حريق مسرح بني سويف

علق الفنان محمد العمروسي، على أزمة المؤلف محمود حمدان والفنان أحمد آدم، حيث استشهد حمدان بـ العمروسي على الموقف الذي رواه، بشأن أحمد آدم.

وكتب محمد العمروسي في منشور عبر حسابه على فيسبوك: البوست ده حتى لا ننسى الفضل بيننا الأستاذ أحمد آدم أستاذ ونجم كبير طاقة فنية وثقافية كبيرة ومن أعلام الفن المصري وليه رصيد كبير، من الأعمال اللي استمتعنا بيها وليه في رقبتي كلمة حق أنا اشتغلت مع أستاذ أحمد سنة 2005 مسرحية برهومة على مسرح الأستاذ جلال الشرقاوي، وقتها كنا بندرس في معهد فنون مسرحية والدكتور جلال هو اللي رشحنا للشغل ولما اشتغلت معاه وكنت حابب إني أضيف حاجة لدوري روحت وقولتله إنى عايز أعمل حاجة في الدور، وقالي سمعني ولما سمع قالي حلو تعالا نجرّبه النهاردة.

وأضاف العمروسي: فعلا قولنا والناس ضحكت وخدنا  تسقيف كبير من الناس فرح وهو على المسرح قالي حلو ده نثبته، وفي نفس السنة كنت بعرض معاه وذهبت إلى بني سويف وحصل الحادث الكبير حريق مسرح بني سويف، وكان من أوائل الناس اللي  جتلي المستشفى ومكنش عايز يمشي وكان كل يوم يطمن عليا وبعتلي إيهاب مدير أعماله بمبلغ كبير علشان العلاج، ولما رفضت آخد المبلغ إيهاب كلمه وقاله محمد مش عايز ياخد الفلوس، كلمني وقالي أنا عمك وزي أبوك خدهم قولتله والله أنا معايا أهلي هنا والحمد لله ولو احتاجت أي حاجه إنت أول حد هكلمه.  

وأوضح محمد العمروسي: اللي أنا عايز أقوله من البوست الطويل ده إننا كلنا بنقع وبنقوم أنا عارف إن صديقي وأخويا المؤلف محمود حمدان متضايق من موقف حصل معاه زمان وعارف إن ممكن يكون أستاذ أحمد كان غلطان في موقفه لكن اللهم لا شماته لأن لو دامت لغيرك مكنتش جتلك وكلنا اتعرضنا لظلم كبير في بداية حياتنا لكن المسامح كريم، وأستاذ أحمد قيمة وقامة كبيرة وأرجو من كل القائمين على الفن المصري النظر والاهتمام بقامتها الفنية.

أزمة محمود حمدان وأحمد آدم

وبدأت الأزمة عندما روى محمود حمدان موقفا جمعه في وقت سابق مع أحمد آدم، وأكد أن محمد العمروسي كان من ضمن الشاهدين على هذا الموقف، حيث كتب: أنت هتاخد فرصتك بس مش معايا مع حد تاني، تقف مكانك متتكلمش، خرجت من المسرح والدموع مكتومة جوايا، وأصحابي بيحاولوا يواسوني (مصطفى أبو سريع وحسني شتا وإبراهيم السمان ومحمد العمروسي).