"العالم كله بيعمل كده".. هاني عادل يدافع عن شيرين عبد الوهاب بعد انتقادات حفلها في "موازين"

دافع الفنان هاني عادل، عن الفنانة شيرين عبد الوهاب، بعد الانتقادات التي طالتها بسبب ظهورها في ختام مهرجان موازين الموسيقي بدورته الـ20 في المغرب.

وكتب هاني عادل عبر حسابه على «فيس بوك»: «علشان بس تخلص الموضوع ونبان برضه إننا ناس فاهمين في المزيكا بشكل حقيقي أو اللي حابب يعني يبين انه فاهم ومذاكر وكده، هعملكم فيديو عن الفرق بين play back، وbacking tracks، بس الناهيه يعني أنا دخلت شوفت حاجات من الحفله قبل ما اكتب شيرين كانت بتغني بشكل حقيقي مكانش صوتها متسجل والدليل على كده أنها لما كانت بتغلط كانت بتوقف المزيكا لان في backing tracks الاغنيه هتبدأ لازم العازفين والمطرب يبقوا حافظين الدخول والموسيقيين حافظين كل المفاتيح بالمللي لان الغلطه مفيهاش رجوع».

أضاف: «يعني الفرقة لما تكون بتلعبب لوحدها ممكن يلحقوا الغلطات ممكن يعيدوا ويزيدوا في الاغنيه لكن مع ال backing tracks الفرقه بتلعب والمغني بيغني بشكل حقيقي وبيكونوا سامعين في ودنهم العد وال tempo وبعض الارشادات في الأماكن اللي ،ممكن يكون معاهم ايقاعات الكترونيه زياده صوت بعض الكورال وكلها حاجات علشان تحسن الكواليتي على المسرح وتخليه بنفس الكواليتي زي الالبوم».

تابع: «ومصر كلها بتعمل ده، ايوه مصر كلها، والعالم؟ اه معظمه ما عدا بعض أنواع الموسيقي والاشكال اللي مش بتحتاج ده بس معظم ال pop science بيعمل كده، أي مغني هتبقي غلطته الوحيده أنه مذاكرش كفايه مع فرقته واستسهل ساعتها هتحصل مصايب على المسرح، وبتمني انه اللي بيتكلم عن الموضوع يكون مذاكر هيقول ايه علشان ميظلمش حد وميظلمش نفسه».