كمال أبو رية: بحس إن ربنا راضي عني.. وكنت محتاج فلوس ودعيت فرزقني ضِعفها
كتب: محمود الديب
تحدث الفنان كمال أبو رية عن أحد المواقف الصعبة خلال حياته، بسبب مروره بأزمة مالية كبيرة واقتراب موعد ولادة زوجته الفنانة ماجدة زكي، مشيرًا إلى أنه لجأ إلى الله ورزقه بضعف ما كان يطلب.
وقال "أبو رية": "كانت مراتي حامل وأنا مش معايا فلوس للولادة، وكان المبلغ المطلوب 3600 جنيه، ففردت السجادة وقومت أصلي ودعيت ربنا، وأنا ساجد سمعت صوت حد بيقولي إنت فين عايزينك في شغل".
وأضاف: "بمجرد ما خلصت الصلاة رن التليفون ولقيت سكرتير المنتج مطيع زايد بيقولي عايزينك في مسلسل، وهو نفس الصوت اللي سمعته لما كنت بصلي، وكان أجري في المسلسل ده 3600 دولار، يعني حوالي ضعف المبلغ اللي كنت محتاجه".
وقال "أبو رية" في البرنامج الإذاعي "كلم ربنا": "دايما بستشعر إن ربنا راضي عني وحاببني، والدليل على كدة إني لما بغفل عن ذكره أو اتصرف تصرف لا يرضيه بحس برد فعل فيه إنذار وتحذير، وده بيبقى من خلال موقف يحصلي، أو مشكلة في حياتي، ولو ربنا مش راضي عني مش هيعمل كدة.
