ابنة الراحل سعيد صالح تحيي ذكرى ميلاده: «السنين بعد وفاته عدت بحنية وطيبة كلام الناس عنه»
كتب: أمنية مدحت
أحيت ابنة الفنان الراحل سعيد صالح ذكرى ميلاده ووفاته بكلمات مؤثرة.
ابنة سعيد صالح تحيي ذكرى ميلاد والدها
وكتبت هند سعيد صالح عبر صفحتها على موقع التواصل الاجتماعي "فيسبوك": "امبارح كان ذكرى ميلاد بابا الـ ٨٥ .. والنهاردة ذكرى وفاة بابا الـ ١١.. ١١ سنة معرفش عدوا ازاى .. عدوا بفضل ربنا وكرمه ونعمه عليا انى أعيش وأتعايش .. عدوا بإنى شايفة نسخة مصغرة من بابا شكل وموضوع وكوميديا وحتى النظرات معايا فى البيت اسمه سليم ( ابنى ).. عدوا بحنية وطيبة كلام الناس عن بابا.. كلام الناس اللى دايما بيهدينى وبيحسسنى إن سعيد صالح ده مش بتاعك لوحدك .. إحنا لينا فيه زيك ويمكن أكتر حقيقى بحس بحزن وحب الناس فى الپوستس اللى بتتكتب عنه سواء فى عيد ميلاده أو ذكراه أو فجأة من غير أى تواريخ وأحداث.. ناس أعرفها ناس معرفهاش بشوف كلامها عنه صدفة وبصدق كلامها لأنه طالع من القلب فبفرح.. وبحمد ربنا على نعمة أنعم بيها عليا لوحدى .. إنى بنت #سعيد_صالح".
وتابعت: "بس السنة دى كانت من أصعب السنين يمكن عشان الظروف النفسية الصعبة اللى لسة بمر بيها بسبب مشكلة جوزى اللى اتكلمت عنها من فترة ولسة قائمة.. يمكن عشان سنة ٢٠١٤ عيد ميلاد بابا كان خميس ووفاته كانت جمعة.. فتفاصيل كل حاجة مؤلمة حصلت السنة دى بتتعاد تانى قدامى، بس كله بيعدى وهيعدى الحمد والشكر لله.. من فضلكم زى ما بتحبوا بابا وبتدعوله من قلبكم ادعولى لأنى فى أمس الحاجة للدعاء شكرا".
