أوس أوس يكشف كواليس احتجازه في مطار إيطاليا: "دخلت أوضة كلها ناس محبوسة وشكلهم يرعب"
كتب: حسناء حسن
روى الفنان محمد أسامة (أوس أوس) موقفًا طريفًا ومقلقًا في آنٍ واحد، تعرّض له أثناء سفره إلى أوروبا لتصوير فيلم "رمسيس باريس"، بطولة الفنانة هيفاء وهبي، حيث تم احتجازه في مطار إيطالي بسبب سوء تفاهم متعلق بالتأشيرة.
وخلال ظهوره في بودكاست "فضفضت أوي" مع المخرج معتز التوني على منصة watch it، قال أوس أوس:"كان المفروض محمد ثروت يسافر يصور، لكن حصلت له ظروف، فكلموني أروح بداله. طلعت الفيزا، وصبغت شعري أزرق، وسافرت على إيطاليا عشان كانت دي البلد اللي مطلع منها الشينجن، وكنت ناوي أكمل لفرنسا بعد كده".
عرض هذا المنشور على Instagram
وأضاف:"وصلت مطار إيطاليا يوم 2 يناير، وكان المطار فاضي بسبب كورونا. وواحد سألني: إنت جاي ليه؟ قلت له باجي كل سنة، مكنتش عايز أقول إني رايح فرنسا ترانزيت، وعايز أختم إيطاليا الأول عشان أبقى في الأمان. سألني هتقعد فين؟ قلت له صديقي مستنيني ورا المطار. بعدها جه ظابط وقال لي اتفضل معانا".
اللحظة الحرجة جاءت عندما تم اقتياده لغرفة احتجاز داخل المطار:"دخلت أوضة كلها ناس محبوسة، قلت سلامو عليكو يمكن ألاقي أي حد عربي، بس محدش رد، وكلهم شكلهم مرعب… وأنا مش فاهم هعمل إيه".
وأوضح أنه بعد التحقيقات، تبيّن أن سبب الاحتجاز هو دخوله بتأشيرة سياحة في وقت كانت فيه إيطاليا مغلقة أمام هذا النوع من الفيزا بسبب قيود كورونا، بينما من سُمح لهم بالدخول كانوا من حاملي تصاريح إقامة أو تأشيرات دراسية.
وتابع:"الظابط جابلي ورقة بالإيطالي عايزني أجاوب عليها، وطلب مني أكلم صديقي، وأنا معيش رصيد. خد موبايلي ووصله على Wi-Fi المطار. كلمت مصري في القنصلية، حكيت له اللي حصل، فقال لي: إنت ليه دخلت إيطاليا؟ قلت له خفت وكنت عايز آخد الختم بس".
وبعد تدخل القنصلية وتوضيح أنه ممثل مصري مسافر لتصوير فيلم في فرنسا، سمحت له السلطات بالدخول لمدة يومين فقط، حيث ختم له الضابط الجواز وقال:"هما بس يومين".
