إيمان الحصري: أنا شخصية عنيدة وأم شديدة والزواج المبكر ينقصه النضج والخبرة
كتب: نسرين إبراهيم
فتحت الإعلامية إيمان الحصري، قلبها وتحدثت عن الكثير من أمورها الشخصية، ومحطاتها بمجال الإعلام، وسبب رفضها خوض تجربة التمثيل.
وأطلقت إيمان الحصري، تصريحاتها هذه من خلال بودكاست "منا وفينا" مع الإعلامية هبة حيدري، على قناة المشهد وكان أبرزها:
أبرز تصريحات إيمان الحصري في "منا وفينا"
- تعرضت لمطبات كثيرة في رحلتي الإعلامية، وأصعب حاجة كانت في البدايات ومع الخبرة الأمر اختلف
- كنت مجنونة سعاد حسني، وكان حلمي أجري معاها حوار إلا أنها توفت، وفي اليوم اللي الجثمان كان راجع تم تكلفتي من القناة أن أذهب لعمل تقرير، وكان من المفروض أخد التقديمة والصندوق يمر من خلفي، لكن انهارت من البكاء، وما عرفتش أكمل شغلي وده أصعب موقف وأثر فيا كتير.
- وليد توفيق طلب مني أشاركه في كليب، واعتذرت وقلبي بيتقطع، لأن عايزة أركز في تقديم البرامج والتمثيل والفن مش من اهتماماتي
- شعرت إنني على الطريق الصح من خلال تجربة 90 دقيقة، اتعلمت فيها كتير أوي، لأن كنت بشتغل 5 أيام على الهواء، وده ممكن يخلي الواحد يغلط كتير لكن بيعلم أكتر.
- البرامج الفنية ليست سهلة، وشايفة عمل لقاء من مع فنان أوقات بيكون أصعب بكتير من إنك استضايف مفكر أو سياسي أو رجل شارع.
- تزوجت في سن صغير عن حب وعمري كان 21 عاما، وقتها كنت شايفة إن ده القرار المناسب وكانت تجربة من أحسن التجارب في حياتي لأن خرجت منها بابنتي
- انفصالي عن والد ابنتي، قسمة ونصيب، وشايفة إن الجواز في سن صغير مش بيكمل لأن مفيش نضج ولا خبرة، وما عنديش مانع أتجوز تاني ولو في حاجة كويسة ليه.
- هنصح بنتي ما تتجوزش في سن صغير، والأفضل تبني لنفسها مستقبل ونكون متأكدة مليون في المية إن ده القرار اللي عايزاه، هنصحها بس مش هفرض عليها رأيي، لأن كل واحد لازم يخوض تجربته الخاصة.
- فرق السن البسيط بيني وبين بنتي خلاني أتعامل معها كأنها صاحبتي وأختي، لكن في فترة كان لازم أكون أم.. وكنت أم شديدة".
- ابنتي لا ترغب في دخول مجال الإعلام ومش ممكن تكون فنانة لأنها خجولة جدا ومش بتحب حتى تتصور ولو كان عندها أي موهبة كانت ظهرت عليها.
- أنا شخصية عنيدة، ومش بفكر إن القرار اللي خدته صح ولا غلط المهم أكون مرتاحة.
