عمرو يوسف يكشف تفاصيل أول مشهد مع نور الشريف: الكلام راح مني خالص

في حلقة جديدة من بودكاست "فضفضت أوي" الذي يُعرض على منصة "watch it"، كشف الفنان عمرو يوسف عن أبرز تفاصيل أول مشهد جمعه بالفنان الراحل نور الشريف في مسلسل "الدالي"، والذي يعد نقطة فارقة في مسيرته الفنية.

وفي حديثه، اعترف عمرو بأنه شعر بتوتر شديد قبل بدء تصوير المشهد، مما جعل قلبه ينبض بسرعة وكان غير قادر على التركيز. وقال:"قبل المشهد بدأت أحس بتوتر بسيط، وقبل ما نبدأ بثلاث دقايق كنت مذاكر ومفيش أي حاجة. ولقيت ضربات قلبي خفيفة ومش عارف مالي. وأنا بعمل المشهد مطلعش ليا صوت. ولقيت نفسي بعرق رغم إن علاقتي بأستاذ نور كويسة وكان بقالنا فترة بنعمل بروفات تربيزة".

وتابع عمرو يوسف في سرد تفاصيل ما حدث بعد ذلك، حيث شعر بالعجز التام أمام نور الشريف وقال:"لما جيت أمثل قدامه الكلام راح مني خالص. قلت له معلش هدخل الحمام دقيقة واحدة. دخلت الحمام بصيت في المرايا وهزقت نفسي وقلت في إيه مالك وفتحت الحنفية وغسلت وشي وعملت المشهد".

ولكن ما فاجأ عمرو أكثر هو رد فعل نور الشريف بعد المشهد، حيث عرض عليه تأجيل التصوير ليوم آخر. وأضاف عمرو:"بعد دقيقتين تلاتة قال لي إحنا جاين بكره وممكن نصوره بكره مش لازم النهارده.. فاجأني بذوقه الشديد، وقد إيه مش معقول الرجل ده كان استثنائي".

موقف غريب مع معجبة

وفي سياق آخر، روى عمرو يوسف موقفًا غريبًا مع إحدى معجباته التي كانت تُرسل له رسائل رومانسية ومنمقة بلغتها العربية، حتى أنه فوجئ بعد زواجه برسائل شتائم غاضبة.

قال عمرو:"كانت بتعت لي رسايل ومش عارف بتجيب الكلام ده إزاي. أحلى كلام ممكن يتقال في العالم. رومانسي ومنمق ولغة عربية حلوة جدًا. وأول ما اتجوزت شتمتني بالأب والأم وبعتت شتمت كندة. وعمري ما رديت عليها حتى لما شتمتني".

هذا الموقف أظهر مدى التغيير المفاجئ في ردود الفعل من المعجبين بعد أن يدخل الفنان في علاقة زواج، وهو أمر يعكس التحديات التي قد يواجهها المشاهير في حياتهم الشخصية.