أسرة عبد الحليم حافظ: عدم الاحترام سمة السوشيال ميديا ولن نقبل أي تطاول يمس أي فرد فينا
كتب: نسرين إبراهيم
عبرت أسرة الفنان الراحل عبد الحليم حافظ، عن استيائها الشديد من التطاول عليهم في التعليقات، عبر الصفحة الخاصة بهم والتي تحمل اسم منزل عبد الحليم والذي تم فتح الزيارات إليه من جديد.
وكتبت أسرة عبد الحليم في منشور عبر "فيسبوك": "توضيح مهم يا ريت كل الأعضاء المحترمين في هذة الصفحة لو عندهم وقت يقروه أنا بعتذر منكم بس أي حد من ساعة ما رجعنا الصفحة تاني بقي بيتطاول علي الأسرة في التعليقات بشكل مهين بقيت بحذف تعليقاتة وبعمله بلوك فوراً.. أنا معنديش مشكلة في أي نقد أو أختلاف في الرأي بس عندي مشكلة في التطاول وعدم الأحترام اللي بقت للأسف سمة وصفة في السوشيال ميديا وطلعت أوحش ما فينا".
وأضافت أسرة العندليب: "أحنا أخر مرة قفلنا فيها الصفحة في ناس كتيير زعلت مننا وطلبت مننا نرجع علشان الصفحة كانت مهمة بالنسبالهم وفيها صور ومعلومات جديدة ومتنوعة جماهير حليم المحترمة محتاجاها وطرح مختلف عن باقي الصفحات الخاصة بحليم..ولما رجعنا، رجعنا بحاجة جديدة ومختلفة علشان بنحبكم و بنقدركم و هي صفحة منزل حليم الرسمية اللي من خلالها تقدروا تعرفوا معلومات عن منزل حليم و تقدروا تحجزوا لزيارة المنزل مجانًا".
وتابعت أسرة عبد الحليم: "قررنا أننا زي ما بنحترم حضراتكم وبنقدركم إننا كمان منقبلش بأي تطاول يمس أي فرد سواء كان من الأسرة أو حتى يمس أي أحد من الأعضاء في هذة الصفحة أيضاً لأنكم جزء لا يتجزء من أسرة حليم، و أظن ده حقنا عليكم وحقكم أيضاً علينا، أخيرًا أنا عايزكم تعرفوا حاجة واحدة بس، أنا بتعامل مع كل الأعضاء المحترمين في هذه الصفحة أنهم جزء من العائلة وبفرح لما بلاقي الناس بتتفاعل معانا أو حتى أو تنصحنا أو تنتقدنا نقد بناء أو تقترح أقتراح مفيد و لما بحط بوست إن في مشكلة بتواجهنا او انتقاد لموقف معين مش علشان عايز أعمل تريند أو أوصل صوتي لحد لأن احنا عندنا تواصل مع كل الصحف والمواقع والقنوات ولكن علشان بحس إن أنتم ظهر وسند للأسرة ونصيحتكم بتبقي غالية علينا قوي الله وبحس إن من حقكم وواجبنا عليكم تعرفوا كل حاجة بتحصل تخص حليم".
وأكملت: "في حد زعل مني لأني البوست اللي فات قولت الصفحة دي متسواش عندي "نكلة" جايز يكون خاني التعبير بس اللي أقصدوا إني مش عامل الصفحة دي للتربح أو أني ألم شير و لايكات و شهرة زائفة لأني عندي شغلي و حياتي الخاصة بعيداً تماماً عن الفن و حقيقي ولا يفرق معايا حتي لو عدد الأعضاء في هذه الصفحة ١٠ أعضاء فقط أو حتى عضو واحد، هفضل برضه أنزل أخبار وصور ومواضيع شيقة عن حليم لأني بعمل الموضوع ده بحب وإخلاص لحليم ولمحبية فقط مش للإعلام والصحافة ولا للايك والشير وبكتب وبتكلم من قلبي ومش بعرف للأسف ألون الكلام و يمكن دة عيب خطير فيا بس معلش أستحملوني لو تقدروا".
واختتمت: “انتظروا النهارده الساعة ٦ مساءً صورتين جداد لحليم فيهم خفة دم وتلقائية وبراءة وضحك، معتقدش الصورتين دوول في حد شافهم قبل كده وهناك المزيد والمزيد قادم”.
