بشرى تكشف سبب انسحابها من مهرجان الجونة: الموضوع بقى بيزنس ومبقاش شبهي

كشفت الفنانة بشرى عن الأسباب الحقيقية التي دفعتها للاعتذار عن استكمال عملها في مهرجان الجونة السينمائي عام 2022، بعد سبع سنوات من مشاركتها في إدارته وتوليها منصب رئيس العمليات.

وقالت بشرى خلال لقائها مع الإعلامية يمنى بدراوي في برنامج ورقة بيضا:«قررت أنسحب لما حسيت إن الموضوع مبقاش شبهي، وبقى مايل ناحية البيزنس أكتر، والمود العام اتغيّر. القرار كان صعب جدًا، زي مشهد من فيلم من تسألني من أنا لما بطلة العمل بتسيب بنتها عند مديحة يسري. أنا ست واضحة مع نفسي ومبعرفش أشتغل في مكان مش مبسوطة أو مرتاحة فيه».

وأضافت أن شعورًا ما راودها بأن البعض بدأ «يستكتر» عليها نجاحها، موضحة:«مش أشخاص معينين، لكن شركات وناس كتير وبعض الزملاء… كانوا فاكرين إني السبب في عدم دعوتهم للمهرجان، وأنا لو مكانهم كنت هفكر نفس التفكير، بس ده مش حقيقي».

وتطرقت بشرى إلى أزمة عدم دعوة بعض الفنانين وصناع السينما الفعليين للمهرجان، معلقة:«فيه فنانين وصناع ورا الكاميرا مش بيتم دعوتهم، والكم الأكبر بيروح للبلوجرز. المهرجان أساسه لازم يكون لأصحاب المهنة، مش المهن المكملة. وطبعًا ناس كتير عندها حق تضايق، ودلوقتي بعد ما مبقتش مسؤولة بقول إنهم عندهم حق في جزء كبير من اعتراضهم».