منة فضالي: أنهيت علاقتي بوالدي نهائيًا ولو حصله حاجة هعمل معاه الواجب
كتب: حسناء حسن
قالت الفنانة منة فضالي إنها اتخذت قرارًا حاسمًا بإنهاء علاقتها بوالدها بشكل نهائي، مؤكدة أنه غائب عن حياتها منذ لحظة ميلادها ولم يقم بأي دور أبوي معها في أي مرحلة.
وأضافت منة فضالي:«اديته أكتر من فرصة نحاول نصلّح العلاقة ونفتح صفحة جديدة، لكن كل المحاولات فشلت، وفي لحظة معينة قررت أوقف عند كده».
وتابعت حديثها عن سبب الخلاف قائلة:«أنا دايمًا شايفاه هروب من المسؤولية، واللي مش قد مسؤولية الأبوة ماينفعش يخلف، خصوصًا مع وجود تفرقة واضحة في المعاملة بيني وبين إخواتي».
وأكدت منة:«والدي ماكانش موجود في أي موقف مهم في حياتي، لا في تعليمي ولا صحتي ولا أي ظرف صعب عديت بيه، وماخدتش منه أي دعم حتى في أبسط الأمور».
وعن موقفها الإنساني تجاهه، أوضحت:«لو حصله أي حاجة هعمل الواجب الاجتماعي بس، من غير أي علاقة شخصية، أكتر من كده لأ».
وفي سياق حديثها عن عائلتها، قالت منة فضالي:«التأثير الحقيقي في حياتي كان من أمي وجدتي لأمي، هما اللي ربوني وشكلوا شخصيتي، وقوة أمي انعكست على قراراتي وطريقة تفكيري».
وأضافت:«عمري ما لومت أمي على الطلاق، بالعكس هي كانت الأب والأم بالنسبة لي، وداعمة لي في كل قراراتي».
واختتمت منة حديثها بالكشف عن تفاصيل مؤلمة من فترة ولادتها، قائلة:«بابا اتجوز في نفس توقيت ولادتي، وده تعب أمي جدًا وخلاها تدخل في حمى النفاس، وأنا اتولدت ناقصة ودخلت الحضانة على طول، بعد محاولات حمل كتير ما كانتش بتكمل».
