محمد سامي: عمري ما أغلط في ست في سن أمي.. وكل القضايا اللي رفعتها عفاف شعيب خسرتها

قال المخرج محمد سامي إنه قرر الحديث للمرة الأولى عن القضايا التي رفعتها الفنانة عفاف شعيب ضده خلال العامين الماضيين، مؤكدًا أن جميع الأحكام الصادرة جاءت لصالحه في كل درجات التقاضي.

وأوضح محمد سامي، قائلًا:« مدام عفاف شعيب بقالها سنتين بترفع عليا قضايا و بتخسرها ، و النهاردة كانت آخر قضية و برضه خسرتها ، ماعرفش ليه هى مصره تقاضينى بدون و جه حق و تقول إنى سبتها و غلطت فيها فى أحد البرامج التلفزيونية و ده محصلش ، و المحاكم حكمت إنه محصلش و بأحكام نهائية و المحاكم سببت أحكامها بأنه لم يحدث مني تجاهها أي تجاوز أو إساءة و كل الأحكام الصادرة من المحاكم الجنائية و المدنية كانت لصالحى فى كل الدرجات .».

وأضاف : أصلا الحلقة اللى هى إدعت إنى سبتها فيها موجوده أون لاين و أي حد يقدر يشوفها ، أنا مستحيل أتجاوز في حق ست فى سن أمي أو أكبر و كمان فنانة كبيرة و ليها تاريخها ، أنا أول مرة اقول تصريح بخصوص الموضوع ده لأنى إنتظرت لما الفنانة تخسر القضايا بكل درجاتها زي ماحصل وبعدين أتكلم .

وتابع: دلوقتى بناقش أنا و المستشار القانوني الأستاذ/شعبان سعيد المحامى المفروض نعمل إيه الفترة دى بعد سنتين من التجاوز فى حقي و الإساءة لشخصي ، إما إننا نبدأ نتخذ إجراءات قانونية ضدها بالتعويض على التشهير و إفساد السمعة أو إننا نقول عفا الله عما سلف و الست و المحامي بتاعها دلوقتى فيهم اللى مكفيهم و المفروض نكبر دماغنا و مانزودش عليهم الهم و نسامحهم و ناخدهم و نتعشى مع بعض بره و نعزمهم على (ريش و بيتزا ) .

وكانت محكمة مستأنف القاهرة الاقتصادية قد أيدت مؤخرًا الحكم الصادر برفض دعوى التعويض المقامة من الفنانة عفاف شعيب ضد المخرج محمد سامي، في القضية المقيدة برقم 8402 لسنة 2024 اقتصادية القاهرة، والخاصة باتهامه بالسب والقذف والتشهير، بعد مطالبتها بتعويض مدني مؤقت قدره 5 ملايين جنيه.