"صاحب السبحة" يروي تفاصيل جديدة في واقعة فتاة الأتوبيس على الهواء

كشف برنامج «حديث اليوم»، خلال استضافة عم بدر المعروف بـ«صاحب السبحة» في واقعة «فتاة الأتوبيس»، أن الفتاة اعتذرت عن إجراء مداخلة هاتفية أثناء وجوده في الحلقة، دون إبداء أسباب إضافية.

رفض المواجهة وتعليق عم بدر
وعلّق عم بدر على رفض الفتاة المواجهة خلال لقائه ببرنامج «حديث اليوم» المذاع على شاشة «الحدث اليوم»، قائلًا: «لا دي مش بتاعتي أنا، أنا جاي أقول اللي يرضي ربنا ويرضي رسوله، أنا مليش علاقة بحد، وأنا لا جاي أدافع عن حد. أنا بصراحة بقيت بتساءل: هل دي قضية حقيقية ولا بحث عن تريند؟».

قرار النيابة وبراءة الشاب
واستشهد عم بدر بقرار النيابة العامة في حق الشاب المتهم، موضحًا: «النيابة أفرجت عن الولد لأنه مفيش عليه أي إدانة، لا سرق ولا عمل حاجة غلط. إحنا دولة عادلة، والولد كان واقف على مسافة بعيدة منها، إزاي يمد إيده أو يقول لفظ؟».

استحالة التحرش اللفظي داخل الأتوبيس
ورد الشاهد على ما أثير حول التحرش اللفظي قائلًا: «الأتوبيس كان فاضي وهادي، وأي كلمة كانت هتتسمع. بدليل إنها لما صرخت لفتت نظري. لو كان قال لفظ مش كويس، الناس اللي قاعدة على اليمين والشمال كانت هتسمع، وده مستحيل».

وتابع: «مين يسمع لفظ خارج يتقال لبنت ويسكت؟ الشعب المصري عنده نخوة ومش هيقبل إهانة أي ست. إحنا لما حد يقول آه، الناس كلها بتجري تساعد، حتى من غير ما تعرف إيه اللي حصل».

تفاصيل جديدة عن الواقعة
وفي سياق متصل، كشف عم بدر تفاصيل جديدة عن واقعة «فتاة الأتوبيس»، مؤكدًا أنه كان حاضرًا منذ بدايتها داخل الأتوبيس وحتى تدخل قوات الأمن، وروى ما حدث لحظة توقف الأتوبيس في منطقة البساتين.

وقال: «وقفنا عند نزلة البساتين على الدائري، وكان فيه عربية نجدة واقفة. هي نزلت تجيب حد من النجدة، وجيه أمين شرطة قال له تعالى. إحنا مجموعة من الناس اللي شافت الموقف رحنا لأمين الشرطة وقلنا له إنه معملهاش حاجة ومكلمهاش، وهي كانت في الشارع بتصوت وتصرخ».