زوجة محمود حجازي: هو لا بيسأل عن ابنه ولا بيصرف عليه وكل يوم بلاقي اتهام جديد صادر منه

نشرت رنا طارق، زوجة الفنان محمود حجازي، بيانًا مطولًا كشفت فيه تفاصيل جديدة حول أزمتها معه، ردًا على تصريحاته الأخيرة بشأن محاولات هروبها بنجلها خارج البلاد، مؤكدة أن ما يتم تداوله يتضمن اتهامات غير صحيحة.

وقالت رنا طارق في بيانها:«أنا رنا طارق زوجة محمود حجازي، وللأسف كل يوم بلاقي اتهام جديد صادر منه، وحابة أوضح كام نقطة مهمة. هو بيقول إن مهما حصل مش هيشيل منع السفر، وأنا عمري ما طلبت منه يشيل منع السفر، واللي متمنع من السفر أصلاً ابنه. ابنه ده مش عايش معاه، ولا هو مسؤول عنه، ولا بيسأل عليه، ولا بيصرف عليه، وبقالي 5 شهور عايشة مع ابني في مكان تاني في مصر، وبصرف على نفسي وعلى ابني لوحدي».

وأضافت:
«لو كنت عايزاه يشيل منع السفر، كنت أخدت الاتفاق اللي عرضه عليّ من كام شهر لما طلب مني فلوس مقابل إنه يشيله، وكنت ممكن أدفع، ما أنا صرفت كتير. أنا قاعدة في مصر علشان قضية الضرب بتاعتي، وعلشان آخد حقي بعد ما إدّاني علقة موت لما واجهته بعلاقاته النسائية، وعندي جلسة يوم 21 فبراير».

وتابعت في بيانها:
«أنا جيت مصر بإرادتي وجبت له ابنه، ومتحملة كل المصاريف علشان يشوف ابنه وعلشان أهله يشوفوه. هو نفسه كان عاملي بلوك وأنا في أمريكا، ومبيسألش على ابنه. حتى أنا عاملاله فيزا لأمريكا 5 سنين، وهو مجاش يشوف ابنه. وبرغم كده جبتهوله على أمل إنه يفوق ويتغير، ولما وصلت مصر اكتشفت مصايب: علاقات نسائية، ولايفات على تيك توك بالساعات، وحاجات مشبوهة».

واستكملت:
«لما واجهته بعلاقاته النسائية المتكررة وطلبت الطلاق، اعتدى عليّ وكنت هموت، ووقّفت إجراءات الجنسية ليه لما اكتشفت العلاقات دي، وده ضايقه أكتر مني. أنا رافعة عليه قضية طلاق، ولما طلبت الطلاق طلب مني فلوس بالدولار، وعلشان كده قاعدة في مصر بسبب القضية دي كمان».

وردت على حديثه عن عدم رؤية أسرته للطفل قائلة:
«هو بيقول إن أهله مشفوش ابنه، وأنا عمري ما منعت حد منهم. بعد ما ضربني قلت لهم مقدرش أجيب ابني في بيوت أو أماكن مغلقة وهو موجود، خوفًا إنه يتعدى عليّ تاني وخوفًا على ابني. أهله نفسهم مش بيقدروا عليه، وهو قال لي إنه ملوش كبير، وهم بيشتكوا منه وبيقولوا إنه عصبي جدًا. إزاي أروح برجلي الشقة اللي كنت هموت فيها؟ قلت لهم أهلًا وسهلًا في أي مكان عام، وهم رفضوا واختفوا».

وأضافت:
«مفيش أي محاولة منه يشوف ابنه، ولا حتى يسأل عنه في التليفون، علشان كان مشغول بعلاقاته النسائية. ولما أخدت قرار تمكين بعد ما طردني من الشقة الزوجية، جاب أهله يعيشوا معاه وهو عارف إن الشقة ما تساعناش كلنا، وعمل كده عن قصد».

وأوضحت:
«لما قلت له نعيش مع بعض علشان ابنك، قال لي: لأ.. خليكم في أمريكا، لأنه ببساطة مش عايز مسؤوليتي ولا مسؤولية ابنه. من كام يوم أخدت حكم نفقة لابنه بيرجع لسنة كاملة، وده أقصى شيء في القانون، لأنه ما صرفش على ابنه من يوم ما اتولد من سنة ونص، والحكم ده دليل واضح إنه ما صرفش ولا مليم».

وأكدت أن قضية التعدي بالضرب كانت سابقة على القضايا الأخرى، قائلة:
«قضية الضرب بتاعتي كانت موجودة قبل الموضوع التاني، واتواجه له الاتهام وخرج بكفالة على ذمة القضية. وأنا مش محتاجة أضغط على حد ولا أعمل حملات ولا أدفع لحد، أنا صاحبة حق».

واختتمت بيانها بقولها:
«هو اللي بيخطط وبيعمل مؤامرات، والمحامي بتاعه بيهدد الصحفيين وبيطلب عدم نشر أخبار القضية وعدم نشر أي رد مني، مع إنه بيطلع يتكلم براحتُه. أنا معايا كل الأدلة اللي تثبت كل كلمة بقولها، وبيمارس إرهاب وتمثيل على الناس، وبيتاجر بابنه علشان يكسب تعاطف ويأثر على القضايا اللي هو متهم فيها، وكل مصيبة يعملها لازم يجيب سيرتي ويقول أنا وراها».