إيناس عز الدين: مرهقة صحيًا ونفسيًا وبجري بين الشغل وأزمة السكن

قالت المطربة إيناس عز الدين إنها تمر بحالة إنهانك شديدة على المستويات الصحية والجسدية والفكرية، مؤكدة أنها تقضي فترات طويلة دون أن تحصل على قدر كافٍ من الراحة داخل منزلها.

وأضافت:«يومي متقسم بين شغل طويل بالليل، وجري ورا إجراءات قانونية النهار عشان أرجّع حقوقي، وفوق ده كله رحلة مرهقة جدًا للبحث عن شقة آدمية أعيش فيها، بعيد عن الشقق المتهالكة أو الأسعار اللي ملهاش أي منطق».

وتابعت:«رغم كل الضغط ده، ملتزمة تمامًا بالحيوانات اللي برعاها، وبحاول على قد ما أقدر أوفّر لهم الأكل والعلاج، حتى ولو على حساب وقتي القليل». وأشارت إلى أن كثرة التنقلات جعلتها ورفيقها أحمد يتبادلان النوم داخل السيارة خلال اليوم.

ووجّهت عز الدين انتقادًا لمن وصفتهم بأن لديهم الوقت لإثارة المشاكل والجدل، قائلة:«أنا حاسة نفسي زي الثور في الساقية، بلف وبشتغل من غير ما ألحق آخد نفسي، ومستغربة إزاي في ناس عندها طاقة تضيعها في حوارات فاضية».

وعن أزمة السكن، قالت إيناس عز الدين:«اتصدمت بواقع غريب جدًا في سوق العقارات، شقق ريسبشنها قد ملعب كورة، وغرف النوم ضيقة قوي كأنها علب كبريت، وأسعار فلكية من غير أي مبرر».

وأضافت بلهجة ساخرة:«أروح أعاين شقة ألاقي البكابورت طافح، والحيطان واقعة، والسيراميك مكسر، وأبواب وشبابيك متهالكة، وكل ده بيتباع على إنه سكن صفوة». وتابعت: «حتى الشقة اللي قالوا عليها بجاردن طلعت طرقة سيراميك أقل من متر، ومتحولة لمصرف مياه تكييفات».

واختتمت حديثها قائلة:«بجد الوضع بقى هم يضحك، ومش فاهمة مين المسؤول عن العشوائية دي ولا الأسعار غير المنطقية دي».

وعلى جانب آخر، قالت إيناس عز الدين إنها استمتعت بالأكلات المقدمة في مطعم الفنانة نهال عنبر الجديد، مؤكدة:«على ضمانتي، الطعم حكاية، جربت كريب في أماكن كتير، لكن هنا الطعم مختلف وكل السندويتشات تحفة».