باسم سمرة: عمري ما جريت ورا لقب نجم شباك.. واللي يهمني أسيب بصمة

قال الفنان باسم سمرة إنه لا يهتم بتصنيفه خارج دائرة “نجوم الشباك” التقليديين، مؤكدًا: «عمري ما شغلني اللقب ده، أنا كل اللي يهمني أعمل دوري بإتقان وأسيب أثر حقيقي عند الناس».

وأضاف خلال لقائه مع الإعلامية أسما إبراهيم في برنامج «حبر سري» على شاشة قناة القاهرة والناس»: «بركز دايمًا على جودة الأداء، يمكن حجم الإنتاج أو رؤية المخرج يتحكموا في مساحة الدور، لكن ده عمره ما أثر على اجتهادي أو التزامي جوه الشغل».

وتابع: «بالنسبة لي النجومية مش أرقام إيرادات ولا تصنيفات سوق، النجومية إنك تفضل موجود في ذاكرة الجمهور، وإن يبقى ليك تاريخ يتقاس بيه شغلك».

وعن تأثير السوشيال ميديا، قال: «الزمن اتغير، وبقى عدد المتابعين والتفاعل عنصر أساسي في صناعة صورة النجم، لكن ده مش دايمًا معناه موهبة حقيقية. الشغل اللي بيتراكم على مدار سنين هو اللي بيعيش».

وأكد سمرة: «أنا باعتمد على موهبتي وثقة الناس فيا، وبحاول أقدم أدوار متنوعة تكشف قدراتي، ولسه بتعلم وبطور نفسي، ومش مؤمن بفكرة النجومية المصنوعة».

واختتم حديثه قائلًا: «في ناس بتلجأ للترويج المدفوع أو إثارة الجدل عشان تتشهر، لكن أنا شايف إن البقاء الحقيقي في الفن محتاج صدق واجتهاد واحترام للجمهور قبل أي حاجة».