تامر حسني يناشد وزارة الصحة: "أرجوكم وضّحوا لنا نأكل إيه وما ناكلش"

وجّه الفنان تامر حسني رسالة إلى وزارة الصحة المصرية وعدد من كبار الأطباء والمتخصصين، من بينهم الدكتور مجدي يعقوب، مطالبًا بتقديم محتوى توعوي مبسط يوضح أسس التغذية السليمة، في ظل حالة الجدل الواسعة حول الأنظمة الغذائية في المجتمع.

وأوضح تامر حسني، عبر منشور على حسابه الرسمي بموقع فيسبوك، أن هناك حالة من الارتباك لدى كثير من الناس بشأن ما هو مفيد أو ضار صحيًا، داعيًا الجهات المختصة إلى التدخل لتقديم معلومات دقيقة بلغة بسيطة يفهمها الجميع.

وكتب:
"في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر، هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا، وإيه اللي مش مفيد."

وطالب بتوضيح عدد من النقاط المهمة التي تشغل الرأي العام، مضيفًا:
"ياريت يكون شرح مفصل يفهمه الشخص العادي من غير أي مصطلحات طبية أجنبية، أولًا: الخضار أمثال الخس والجرجير وورق العنب وكل الورقيات مفيدة ولا لأ وإزاي نطمن إنها مش مرشوشة مواد تمرض الناس، ثانيًا: البيض والفراخ اللي في بلدنا ناكله إزاي وإزاي نميز ونطمن إنه مش محقون وإزاي نعرفه لو محقون".

وتابع تساؤلاته حول بعض العادات الصحية الشائعة قائلًا:
"ثالثًا: شرب المية بكثرة كما تعلمنا مفيد ولا لأ، رابعًا الحليب مضر ولا كويس وإيه الصح اللي نشربه، خامسًا: الأدوية لازم تتاخد ولا مش لازم ولا مش أي أدوية تتاخد".

كما دعا إلى إنتاج محتوى مرئي مبسط يقدمه مختصون، مؤكدًا:
"أناشد وزارتنا المصرية تعملنا ڤيديوهات حد يطلع يكلمنا بالعامية، ويرد بالتفصيل، وبالأدلة العلمية على كل ده وياريت يساعدني صديقي المحترم الأستاذ الفاضل أيمن عباس، بما إنه صاحب أكبر المستشفيات ياريت يطلعلنا دكاترة من عنده مختصة يعملوا ڤيديوهات ترد على كل اللي حاصل في مجتمعنا، وبناشد برضو الدكتور العظيم مجدي يعقوب يدينا من خبرته العظيمة والدكتور الكبير حسام موافي، ويساعدونا الفترة دي كشعب ويريحونا من الجدل الفظيع ده".

واختتم تامر حسني رسالته بالتأكيد على أهمية حسم هذا الجدل، قائلًا:
"لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة، أرجوكوا متسيبوناش كده لا إحنا ولا ولادنا، وأرجع وأقول محتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح، وأنا ليه بقول محتاجين أكتر من جهة تتكلم؟ عشان كلنا نطابق الكلام ببعضه مع المنطق ونحكم صح".