نادر أبو الليف يستغيث بسبب خلافات الميراث: «أخويا عايز ياكل حقي»

كشف الفنان نادر أبو الليف عن معاناته مع خلافات أسرية تتعلق بالميراث، مؤكدًا أن النزاع القضائي بينه وبين شقيقه مستمر منذ أكثر من 10 سنوات، دون أن يتمكن من الحصول على حقه حتى الآن.

وكتب أبو الليف عبر حسابه الرسمي على موقع “فيسبوك”، معبرًا عن حزنه من تغير العلاقات الإنسانية والأسرية، قائلًا إن البعض أصبح لا يهتم سوى بمصلحته الشخصية، حتى وإن كان الأمر على حساب أقرب الناس إليه.

وأشار الفنان إلى أن الخلاف القائم بينه وبين شقيقه يتعلق بميراث عائلي، موضحًا أنه فوجئ بما وصفه بمحاولات الاستيلاء على حقه الشرعي، رغم روابط الدم والتربية التي تجمعهما.

وأضاف أبو الليف أن النزاع تسبب في استنزافه نفسيًا بسبب استمرار القضايا داخل المحاكم لسنوات طويلة، مؤكدًا أنه يسعى فقط لبيع شقة موروثة وتقسيم قيمتها بشكل عادل يرضي جميع الأطراف.

كما أعرب عن استيائه من تعطل الإجراءات القضائية، مشيرًا إلى أن كل دعوى يتم رفعها تواجه – بحسب وصفه – عراقيل قانونية تؤدي إلى تأجيل الفصل في القضية.

وأكد الفنان أنه لا يرغب في تصعيد الأزمة إعلاميًا أو الدخول في صراعات علنية، خوفًا من تحويل حياته الشخصية إلى مادة للجدل عبر وسائل الإعلام ومواقع التواصل الاجتماعي.

وجاء في نص رسالته:

"السلام عليكم.. عايز أعرف ليه الناس ضمايرها ونفوسها وأخلاقها وتربيتها اتغيرت من جواها.. كل واحد بقي يهمه نفسه فقط لا غير ومش مهم أي حد علي وجه الأرض.. كله  بيقول يا نفسي.. حتى للأسف الشديد أخوك ابن أمك وأبوك اللي نازل أنت وهوه من رحم  واحد ومتربيين في بيت واحد عاوز  ياكلك ويدوس عليك وياكل ورثك ليه خلاص مبقاش في ضمير ونخوة ورجولة ودين ومبادئ وأخلاق ومراعاة  للدم اللي بينك وبينه..

يا ناس قسما بالله الكفن مالهوش جيوب وهتنزل التربة مش معاك غير عملك  مش هتاخد حاجة معاك فكر كدا لما تقابل رب كريم هتقوله إيه هتقوله إنك كنت عايز تقتل أخوك علشان تورثه ولا هتقوله كنت عايز تاخد ورثه علشان إنت ظالم ومفتري وحقودي وجواك حقد وغل وكره لأخوك وللكون كله.. هو حصل إيه في الدنيا يا ناس نفسي أعرف وللأسف معاه محامي حسبي الله ونعم الوكيل فيه كل لما نرفع قضية يروح رايح المحكمة ويحفظها بطرق وبأساليب ملتويا بقالي أكتر من عشر سنين دايخين في المحاكم علشان نبيع شقة ورث وكل واحد ياخد ناصيبه بمي يرضي الله وللأسف المحاكم والقضايا إللي زي دي بتاخد سنين طويلة..

نفسي يفوق ويحس ويعرف إننا إخوات وعمر الدم مايبقي مياه لكن هو للأسف الشديد ولا بيفكر ولا يهمه ولا شايف ولا سامع  غير نفسه ومصلحته..ولو اتخذت أي شيء معاه للأسف الإعلام والصحافة مش هيسبوني وهبقي محتوى للخوض فيا ومتكتف ومش عارف أتصرف وأعمل إيه.. وأتمنى أي مسؤول أو أي حد يرد عليا بحل سريع ينهي موضوع الورث اللي هو حقي ومش عارف أخده من أخويا  وربنا يهديه لنفسه ويتقي ربنا يعطي كل واحد حقه بمي يرضي الله أتمني الرد ولكم جزيل الشكر نداء إلي كل من يهمه الأمر من الجهات المعنية وكل عيد وأنتم بخير".