نادر حمدي ينتقد تجاهل دور الموزع الموسيقي في نجاح الأغنية

أثار الموزع الموسيقي نادر حمدي حالة من الجدل بعد حديثه عن أهمية دور الموزع الموسيقي في صناعة الأغنية، مؤكدًا أن نجاح أي عمل غنائي لا يعتمد فقط على الكلمات واللحن، بل هو نتاج تكامل جميع عناصره.

وكتب حمدي عبر حسابه على «فيسبوك»: «الموزع الموسيقى الشاطر هو اللى ما تحسش بوجوده فى الأغنية؛ ما بيلفتش الانتباه علشان يظهر أو تحس بيه كمستمع، لكن يخليك تحس بالأغنية كحالة، سواء كانت سعيدة أو حزينة».

وأضاف: «دوره هو دور المخرج الموسيقى، ونقل حالة الكلام واللحن والغناء للمستمع مباشرة، لأنه آخر مرحلة بتمر عليها الأغنية، وبنجاح الأغنية بيكون قدر يوصل الحالة الفنية لكل صُنّاعها».

وتابع منتقدًا تجاهل بعض صُنّاع الموسيقى لدور الموزع، قائلًا: «بقالى فترة ملاحظ إهمال للأسف بعض الملحنين والشعراء، فى لقاءاتهم لدور الموزع الموسيقى، وكأن الأغنية بتنزل أو بتنجح (كلام ولحن فقط)!، مش عشان دورنا المفروض يبقى غير محسوس، نبقى كمان مهمشين!.. مش كفاية كده ولا إيه؟، يا ريت يا جماعة نعرف إن الأغنية عمل جماعى مكوّن من: شاعر - ملحن - موزع موسيقى - عازفين - مهندس صوت.. شكرًا».

وفي سياق متصل، كشف الملحن نادر نور عن معاناته خلال الفترة الأخيرة، مشيرًا إلى ابتعاده عن الساحة الغنائية والصعوبات التي واجهته في محاولة العودة.

وكتب عبر «فيسبوك»: «باعتذر لكل الناس اللى بتبعتلى كلمات أغانى من فضلكم متبعتوش تانى.. معنديش مشاريع شغال عليها ولا نجوم بتسمع منى أغانى ولا عندى حاجة أقدر أساعدك بيها لأنى ببساطة محتاج اللى يساعدنى».

وأضاف: «وللناس اللى بتتهمنى بالكسل والتقصير أنا فعلًا بعدت فترة لأسباب شخصية وباحاول أرجع من 3 سنين ومش عارف.. مسيبتش باب مخبطتش عليه.. فقدت التواصل مع الأغلبية العظمى داخل الوسط الغنائى... وبقيت أحس بالرفض وعدم التقبل، وأنا مش متعود أزن على حد أو أطلب الحاجة أكتر من مرة بشكل يقلل منى ومن احترامى لنفسى بعد كل اللى قدمته حتى لو كان قليل فهو كبير من وجهة نظرى».

واختتم: «أخيراً معنديش مشاكل مع حد ولا باكتب الكلام ده لكسب تعاطف حد، وكل الاحترام والتوفيق لزملائى، أنا مش زعلان من حد.. وآسف على الإطالة».

وتفاعل المستشار تركي آل الشيخ، رئيس هيئة الترفيه السعودية، مع منشور نادر نور، حيث كتب: «إنت فنان كبير وأنا حابب أشتغل معاك»، في لفتة لاقت ترحيبًا واسعًا بين المتابعين.