مجدي الهواري يوضح سبب هجومه على محمد صلاح
كتب: نورهان طلعت
علق المُخرج مجدي الهواري على الهجوم الذي تعرض له بسبب رأيه الصريح عن عدم قيام الاعب العالمي المصري محمد صلاح بتجديد تعاقده مع نادي ليفربول.
وكتب "الهواري" عبر حسابه الرسمي بموقع "فيسبوك"، قائلاً:"طب توضيح وتصحيح لبوست محمد صلاح قبل الحذف "مش عيب" المفروض أن معروف قد إيه أنا بحب محمد صلاح مش محتاج أقول ده ! لأني بشجع النادي اللي بيلعب فيه بس علشانه وقبل كده كنت بشجع روما وقبلها تشلسي برضه علشانه، وحاطط صورته فوق سرير بطل مسلسلي طول ال30 حلقة علشان يبقي قدوة لكل جيل والشباب اللي بيشوفوا المسلسل ومنهم ولادي، وأنا واحد من الناس الي شايف إنه مش واخد حقة وقولت ده كتير، سواء في فرصة الكورة الذهبية ولا حتى في مرتبه اللي بيخده حالياً، بس رأي مش مهم جنب المعايير العالمية لفرصة الاتنين".
وأضاف: "بس جات الفرصة في العروض اللي بتتعرض عليه في نوادي تانية بالرقم اللي هو عايزه ويمكن أكتر سواء في باريس سان جيرمان أو الريال وهو عارف أن ليفربول مش يدفعوا الرقم ده لحسابات كتيرة واكتر رقم هيدفعوه هو الـ 400 ألف، وأنا كتبت قبل كده أوعى تمشي ياصلاح من نادي عملك نشيد، المشكلة مش هنا، ولا المشكلة في الانتقال، المشكلة في الحسم وفي القرار، علشان صلاح يركز في الكورة، والله ده كان قصدي، المشكلة في سبب كتابة البوست الانفعالي جدًا علشان مصلحته في اللي كتبته، المشكلة أن إبننا صلاح تركيزه في المباريات بيقل لما يكون في حاجة تانية شغلاه ومحدش ينكر ده، لدرجة أن الخصم بقي يلعب علي ده وواضح أن مدير أعماله مش باعد عنه كل كلام المفاوضات ومخليه بيفكر طول الوقت معاه، لازم يشتغل على نفسه في الموضوع ده زي ما اشتغل على نفسه في حاجات كتيرة وبقي قدها واتخلص منها، زي إتقان اللغة وتحديات كتيرة جداً وتدريباته المستمرة علي رفع كفاءة الاداء".
وأكمل حديثه :"وبعدين مع كارثة كمان خروجنا من كأس العالم اللي لحد دلوقتي مأثرة عليه واحساسه بالمسؤلية أمام الشعب المصري كله، مش بس جمهور الكورة اللي احنا نفسنا واضح نسيناها وهو الوحيد اللي لسه متأثر بيها، مع الفرصة الضايعة في الكورة الذهبية تاني، لإنه معملش حاجة لمنتخب بلده، واللي مخليه مش بينام بسببها، الله يكون في عونه الصراحة أحلام كتير بيفكر فيها وأفكار كتيرة بترن جواه و مخلياه مش في الفورمة بقاله شوية حلوين، هو إنتم كمان مش معايا إنه من ساعة مارجع من أفريقيا وهو مش تمام، ولا مش متابعين الفرص الكتير الضائعة منه اليومين دول ولا كلوب لما قال صلاح بنعالجه بعد رجوعه، قولوا كلمة حق بقى لصالحه".
وأختتم مجدي الهواري حديثه، قائلاً:"اليومين دول يومين حسم الألقاب يا أبو صلاح، مفيش دلع، دوري بعد ماتش تعادل توتنهام، وأبطال أوروبا وماتش الريال والثأر القديم، ولقب الهداف اللي سون قرب منه بعشرين جون، وتركيزك في الانتقال والمفاوضات، علشان كده بقولك أنت في خطر، ركز، أعتقد أن كلامي كده وضح ياجماعة إني خايف على صلاح، وده سبب في انفعالي لإنه الحاجة الوحيدة الحلوة اللي حيلتنا، ولا إيه، أنا عايزه يركز في الكورة في الملعب لإنه ده هو اللي هيجيبله ويجيب لنا كل الخير، مساء الخير ياصلاح، و زي ماتريكه بيقوله، ركز ياصلاح، أشوفكم بعد ماتش الريال، مبارة الحسم، أتمني عودة صلاح بكأس أبطال أوروبا، يارب يبقي كلامي حماسي للفرعون الصغير فخر قلبنا".
