صاحب مشهد "مين اللي أكل الجبنة".. الفنان طارق عصام يشكو من قلة العمل والتجاهل في الوسط الفني

كشف الفنان الشاب طارق عصام عن معاناة قاسية يعيشها في الوقت الحالي، بعد سنوات طويلة من الغياب عن الساحة الفنية، مؤكدًا أنه يمر بأزمة حقيقية بسبب انعدام فرص العمل وعدم امتلاكه أي مصدر دخل ثابت.

وخلال ظهوره في مقطع فيديو عبر تطبيق تيك توك، تحدث بصراحة عن حالته، قائلًا:
"أنا طارق عصام اللي عملت فيلم (أبو علي) مع كريم عبدالعزيز، وأنا اللي كلت الجبنة، وعملت (حاحا وتفاحة)، و(بوشكاش) مع أستاذ محمد سعد، وكمان مسلسلي (ركين) و(ابن موت)، بقالي أكتر من 10 سنين محدش بيتواصل معايا، مع إني في وقت من الأوقات كنت مكسر الدنيا، وكل المنتجين كانوا بيكلموني، لكن دلوقتي مفيش أي حاجة".

وأضاف موضحًا تفاصيل حياته الصعبة:
"عندي 30 سنة، وكنت بمثل من وأنا عندي 8 سنين لحد 14 سنة، ودلوقتي معنديش أي مصدر دخل، ساعات بنزل أشتغل مع أصحابي في المعمار عشان أقدر أصرف على نفسي، وبقالي سنتين ونص خاطب ومش عارف أتجوز، وفي أوقات كتير مبيبقاش معايا حتى مصاريف".

كما أشار إلى محاولاته للتواصل مع نجوم وصناع العمل دون جدوى، قائلًا:
"بعت لأستاذ كريم عبدالعزيز، ومحمد سعد، وأحمد السبكي أكتر من مرة، ولما كنت بعمل (بوشكاش) الأستاذ أحمد السبكي كان عايز يعمل معايا عقد احتكار لمدة 7 سنين، ولما رفضت وقف التعامل معايا، كلمت كريم عبدالعزيز برضه، لكن مفيش رد، أنا مش بطلب بطولة ولا فلوس، أنا عايز فرصة أرجع بيها، حتى لو إعلان أو مسرحية".

وعبّر عن أمنيته في العودة مجددًا إلى التمثيل، مضيفًا:
"نفسي أرجع أمثل تاني وأكسر الدنيا، لأن التمثيل هو الحاجة الوحيدة اللي بعرف أعملها، ونفسي أمثل مع أحمد العوضي لأنه عسل بصراحة".

واختتم حديثه برسالة مؤثرة تعكس حجم معاناته:
"أنا دلوقتي متدمر وبعيش أسوأ أيام حياتي، وكل يوم بقعد مع نفسي وأفتكر إزاي كنت بشتغل، وأهلي وصحابي كانوا فخورين بيا، ودلوقتي مش عارف أعمل حتى مشهد. مش طالب دور بطولة، عايز مشهد أو اتنين يرجعوني للحياة، لأن دي الحاجة الوحيدة اللي بحبها".

يُذكر أن طارق عصام شارك في طفولته بعدد من الأعمال السينمائية والتلفزيونية البارزة، من بينها أفلام "أبو علي" و"بوشكاش" و"اللمبي 8 جيجا" و"365 يوم سعادة"، إلى جانب مشاركاته في عدة مسلسلات.