حرص الفنان مدحت تيخا على توضيح تفاصيل أزمته مع المنتج عوض ماهر، بسبب مستحقات مالية متأخرة، وذلك بعد حصوله على حكم بحبس المنتج لمدة 6 أشهر على خلفية تحرير شيك بدون رصيد.

كما رد مدحت تيخا على هجوم الفنانة عفاف مصطفى عليه، مؤكدًا أنه اختار مسامحتها، خاصة أنه يعتبرها في سن والدته.

وقال مدحت تيخا في فيديو نشره عبر صفحته على موقع التواصل الاجتماعي «فيسبوك»: «الشيك ده بقاله 3 سنين، وأنا صابر ومستني بقالي 3 سنين عشان أعرف آخد حقي. من شهر اكتشفت إن الشيك مدته هتسقط بعد أيام، فكلمت الأستاذ وقولتله لو سمحت اديني فلوسي، فقال مفيش فلوس كالعادة على مدار 3 سنين».

وأضاف: «قولتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك 3 سنين كمان، يبقى أنا كده مستني 6 سنين، أظن أنا عداني العيب وأزح زي ما بيقولوا».

وتابع موضحًا سبب لجوئه إلى القضاء: «أنا مكنتش مختار إن أنا أرفع قضية، أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوضت أمري لله وربنا موجود، ولكن أنا لجأت للقضاء عشان أضمن حقي وأضمن فلوسي اللي اشتغلت بيها».

وأشار إلى أنه تعرض لهجوم وعبارات مسيئة بعد اتخاذه الإجراءات القانونية، قائلًا: «أول ما أنا عملت كده هو معجبوش، وفجأة أول ما عرف إن أنا رفعت قضية، شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كده».

وعن انتقادات عفاف مصطفى، قال مدحت تيخا: «اللي فوجئت بيه النهاردة وضايقني أوي على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد، أنا مش عارف هي بتعمل فيا كده ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة؟».

وأكد تمسكه باللجوء إلى القانون، قائلًا: «أنا لجأت للقانون لإننا في دولة قانون، والحمد لله المحكمة حكمتلي، فده حكم محكمة، أنتم بتعترضوا على حكم المحكمة؟».

واختتم مدحت تيخا حديثه بالتأكيد على مسامحته لكل من أساء إليه، قائلًا: «أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟ بدل ما تقفوا جنبي بتهاجموني مش عارف ليه».

وأضاف: «أنا مسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي، فأنا مسامحك».

وفي ختام حديثه، وجه مدحت تيخا الشكر إلى الدكتور أشرف زكي وشعبان سعيد، محامي النقابة، قائلًا: «حبيت أوجه بس التوضيح ده للسادة الصحفيين ولكل الوسط الفني إن الشيك ده بقاله 3 سنين وكنت مستني 3 سنين كمان، بس هو اللي مرضيش، عشان كده لجأت للقضاء».