«عرفت غلطي ومش حاسس بطعم النجاح بره بلدي».. حسن شاكوش يعتذر لنقابة المهن الموسيقية

قدم حسن شاكوش، مطرب المهرجانات، اعتذارًا لنقابة المهن الموسيقية برئاسة الفنان هاني شاكر وكذلك للشعب المصري، موضحًا أنه ممنوع من الغناء من قبل نقابة الموسيقيين منذ 9 أشهر.

وقال "شاكوش": "عرفت غلطي الفترة اللي فاتت، أنا موقوف بقالي 9 شهور وحقيقي أنا غلطت ومفيش بني آدم مش بيغلط".

وتابع: "كان لازم أطلع دلوقتي أعتذر للشعب المصري وكل الدول العربية وكل اللي بيسمعوني، وبقولهم ان شاء الله الفترة الجاية الواحد عرف غلطه، ومش هيسمعوا مني أي غلط تاني أو أي حاجة تسيء للشعب المصري".

ووجه الشكر للرئيس عبد الفتاح السيسي، قائلا: "الرئيس السيسي أبونا كلنا وربنا يخليهولنا على الإنجازات اللي بنشوفها في البلد".

واستطرد:  "بتأسف لنقابة المهن الموسيقية وإن شاء الله الغلط مش هيتكرر تاني والأستاذ هاني شاكر حبيبنا كلنا وهو عارف وبقولهم إني همشي على الطريق الصحيح اللي هيقولولي عليه واللي الأستاذ هاني شاكر هيكلفني بيه، ومش هخرج عن أي سوء سلوك قد يسبب أزمة".

وأردف: "أنا كنت منضبط في شغلي ومكنتش بقصر، ولكني غصب عني كانت مشكلة وأنا اتعلمت واتحاسبت واتوقفت ودلوقتي بعتذر للشعب المصري بالكامل".

واستكمل: "أنا قدمت تظلم مرتين لنقابة المهن الموسيقية ورفضوا وقدمت تظلم ثالث أتمنى من النقابة وأعضائها يبصوا فيه"، مضيفًا: "أنا بشتغل خارج مصر ومش حاسس بطعم أي نجاح بره بلدي، وبيجيلي شغل في مصر لكني ملتزم بالقرار الذي أصدرته نقابة المهن الموسيقية ويستحيل قرار يطلع منهم وأنا أخالفه وأروح أشتغل".

واختتم "شاكوش": "التراب اللي بنشيله في بلدنا حاجة تشرفنا، وأنا مش حاسس بأي طعم لنجاح في أي بلد بروحها"، مؤكدًا: "ياريت أعضاء النقابة كلهم يقبلوا أسفي والأستاذ هاني شاكر فنان كبير وأخونا وبتأسفله وبقولهم أنا ابنكم وبقول للشعب المصري مش هتسمعوا حاجة مني تاني مش كويسة"، وجاء ذلك خلال مداخلة هاتفية لبرنامج "على مسئوليتي" مع الإعلامى أحمد موسى على فضائية "صدى البلد" مساء الأحد.