تامر حسني يوجه رسالة لطلاب الإسكندرية بعد تقديم فيلم تسجيلي عنه
كتب: نسرين إبراهيم
أعرب النجم تامر حسني عن سعادته شديدة، بتقديم طلاب الثانوية العامة بالأسكندرية، فيلم تسيجلي تحفيزي للشباب والذي كان ملهم لهم من خلاله.
وحرص على توجيه رسالة مؤثرة، لطلاب وأساتذة الثانوية العامة بالأسكندرية بعد إعجابه الشديد بالفيلم التسجيلي، الذي قام بنشره عبر حسابه الرسمي على "إنستجرام"، قائلا :"طلاب وأساتذة الثانوية العامة الأسكندرية.. مش عارف أقولكوا قد إيه فرحت بكلامكوا وباللي شوفته في الڤيديو من محبه صادقه وتأثير صادق وحقيقي بينا، شكراً لكل طالب حس كلمه ايجابيه مني وأثرت فيه سواء في كلامي أو افلامي أو أغانيا شكراً لكل مدرس حط رسايلي الصادقه ليكم في عين الإعتبار وخاطبكم بها".
وأضاف، "وحمداً لله إن علاقتنا مش مجرد فنان وجمهور لا دي أكبر من كدا بكتير ودي العلاقه اللي حلمت بيها من صغري، بقدر الإمكان بخرجلكم من رحلتي كل ما هو إيجابي ليكم من نصيحة أخ الى كلمه تحفيزيه واللي جاي مني ليكم أكتر وأحلى بإذن الله وواثق انه هيوصل قلوبكم عشان زي ما قولتلكوا زمان اللي بيطلع من القلب بيوصل للقلب، شكراً شكراً طلاب اسكندريه وشعب اسكندريه العظيم شكراً شباب مصر أم الدنيا يارب".
وتابع: "كلكم ناجحين واللي عنده خطأ يصلحه الحياه لسه قدامكم والوقت لسه في ايدكم اي صعب هيعدي وبكرا تنجحوا و تبقوا اصحاب قصص حياه جميله كل واحد فيكم لازم يبقى بطل في قصة حياته عشان كدا متزعلوش من أي صعب وأي أخطاء وأي فشل في أي اتجاه الحياه رحله ومشوار طويل مش موقف ولا موقفين، والحل الوحيد اننا ننجح ونعتمد على نفسنا وتتعلموا انكم متسندوش على أشخاص عشان لو مشيوا متقعوش اسندوا على،، أولاً ايمانكوا بربنا دا أهم وأقوى سند.. تاني حاجه اسندوا على حلمكم و جهودكم ونجاحكم اسندوا على قوتكم انتوا".
واستطرد، قائلا: "وهقولهالكوا تاني احنا في زمن صعب لو احتاجت ايد تسندك وتدفيك امسك ايدك التانيه برغم ان في كتير طيبين بس الحياه تلاهي واللي سندك مره مش هيسندك التانيه، و كمان جه دوركوا انكم تفرحوا اهاليكم و تكونوا انتوا سندهم عشان لما بيكبروا هما اللي قلوبهم بتتحول قلوب اطفال و بتحتاج رعايه منكم انتوا بيبقوا محتاجين انكم تردولهم اللي عملوه معاكم وانتوا صغيرين".
واختتم: "معلش طولت عليكم وعارف ان من سمات العصر انكم مش بتحبوا تقروا الكلام الكتير بس انا عارف كلامي رايح لمين رايح للّي محتاجينه ومستنيينه فا هيقروه كويس جداً عشان من كل قلبي لحبايب قلبي، وإن شاء الله هشوفكوا قريب، بالتوفيق يا أمل مصر".
View this post on Instagram
