أرملة يونس شلبي: «بعت الفيلا فترة مرض الراحل.. ومعنديش غير معاش النقابة»

قالت أرملة الفنان الراحل يونس شلبي إنه كان يرفض دخول أحد من أبنائه إلى عالم التمثيل مشيرة إلى أنه «كان حنين مع البنات لكن مع عمر لا، ويونس مكنش حابب يدخل العيال مجال الفن، وعمر درس إعلام قسم علاقات عامة».

وكشفت عن مصدر دخلها قائلة: «معنديش غير معاش النقابة، والحمد لله نعمة ربنا علينا.. كفاية إنه بيطبطب علينا، وأنا مقتنعة بربنا واللي جابهولي».

وعن المتاعب التي واجهتها قالت: «مفيش حد معندوش مشاكل.. وهما فاكرين الفنانة حياته سعادة واللي يشاور عليه يبقى موجود لكن لا.. إحنا ناس عاديين عندنا برضه الوحش والحلو وبنمرض».

وتابعت: «ومريت بمراحل صعبة معاه في المرض وكان أصعب حاجة، لإن كانت عياله كلها صغيرة، وهو بدأ يمرض سنة 95، وكانت بنتي الكبيرة لسه في ثانوي وكنت لسه والدة سارة، وهو كان عامل بيت لينا ولكل بنت شقة، واستديو على أساس إنه كان الاستديو ده يشتغل فيه ويشغله، ومكان ليا أنا وهو في الفيلا من تحت، وهو لما تعب بعتها لإني دخلت في تطورات كتيرة وعمل عمليات كتير، وأنا اللي كنت ببيع عشان كان مطلوب مني عمليات وأكياس دم».

وأضافت: «الحمد لله كفاية إني ربيت عيالي وعلمتهم وكانت كل مشكلة يونس شلبي إنه عايز ولاده يتعلموا تعليم عالي وأنا الحمد لله لغاية أصغر بنت أمينة اللي سميتها على اسم مامته» متابعة: «الناس بتبص لنا على إن احنا طول الوقت بناكل بمعلقة دهب».

وقالت أرملة يونس شلبي: «سكننا في مكان تاني غير اللي ربيت فيه أولادي، والبنات مبخليهمش يتجولوا في المكان اللي هما فيه يعني مبينزلوش، لأن لما الناس بيعرفوا إن دول ولاد يونس شلبي بيبصوا لهم باعتبار إنهم كانوا قاعدين في قصر واتنقلوا شقة».

بينما تحدثت سارة ابنة يونس شلبي قائلة: «شرف ليا إني أبقى بنت يونس شلبي، وبابا في البيت كان حنين قوي وكان معانا حاجة تانية غير الشاشة والشهرة، وكان بيعرف يفصل بين شغله وبين البيت»، لافتة إلى أنه كان يكشف لهم كواليس المسرحيات حينما يشاهدوها سويًا: «بابا كان حنين علينا وماما كانت تشد علينا وحنينة على عمر».

وكانت أسرة الراحل يونس شلبي حلت مع الإعلامي شريف عامر في برنامج «يحدث في مصر» المذاع عبر فضائية «MBC مصر».