خاص.. حلمي بكر يرد على هجوم نجل حميد الشاعري: هربيه لو أبوه ما عرفش يربيه

رد الموسيقار الكبير حلمي بكر، على هجوم الموزع الموسيقي نديم الشاعري نجل حميد الشاعري، بعد خروج الأخير عبر السوشيال ميديا يعلق على انتقاد الأول لوالده.

وعبر حلمي بكر في تصريح لـ"العاصمة" عن اندهاشه الشديد من أسلوب نجل حميد الشاعري غير اللائق، قائلا: "أنا مش عارف إيه الحكاية دي، لا أنا اتكلمت عن حميد ولا جبت سيرته، وبعدين يطلع ابنه يتكلم بالطريقة غير المهذبة دي".

وهدد بكر بمقاضاة نجل الشاعري، قائلا: معنديش غير طريقة واحدة للرد عليه هتربيه بدل ما أبوه ما عرفش يربيه، هقدم بلاغ للنائب العام ضده بتهمة السب والقذف، قبل ما تبقى فنان خليك مؤدب".

وانتقد حلمي، استخدام البعض للسوشيال ميديا ومن بينهم نجل حميد في الهجوم على الكبار، قائلا: "السوشيال ميديا هي اللي هتجيب أخرنا، للأسف كل واحد عايز يتشهر يقوم يطلع يضرب في هرم، أو يضرب في حاجة تعوره هو شخصيا، ويعني إيه علشان ابن فلان يستغل ده ويغلط، ولما ابن فلان يتطاول يبقى محتاج أبوه يلفت نظره ويربيه، للأسف بقينا في مرحلة الإساءة والتطاول والجهل هو اللي منتشر".

وتابع: "أنا شغلتي أمتحن الناس دي كلها، وأنا اللي امتحنت حميد الشاعري وأنا اللي منحته الكارنيه، يقوم يطلع ابنه ويغلط".

وكان قد شن نديم الشاعري هجوما على حلمي بكر عبر حسابه الشخصى على "فيسبوك"، بوست مطول وهاجمه بشدة على انتقاداته المستمرة لوالده بقوله: "أستاذ حلمى لو محتاج مساعدة ماديا أو نفسيا الكابو مش حيتاخر عليك، لكن ما ينفعش كل ما تتزنق تروح برنامج تجيب سيرة حميد الشاعرى الى للأسف تاريخك ميجيش تمن تاريخه ولا فنيا ولا أخلاقيا للأسف".

واستطرد: "أوعى حضرتك تفتكر أنك محطوط فى خانة الإنسان المحنك، لا للأسف أنت عبرة لكل نفسية فاسدة منتهية الصلاحية فنيا وأخلاقيا، فرق التربية كبير أوى بينك وبين الكابو حتى فى الفكر الموسيقى والمعاملة مع الناس".

واستكمل: "الكابو كبير مقامه ومش بيرد عليك عشان هو أكبر من كده، وأكبر منك بالذات، ودايما بيقولى ما تردش على حد، لكن ولاده كبروا ومش حيسمحوا أنك تقطع فى أبوهم".