شيراز حسني تتهم موزع أغنيتها «أنا مش مامتك» بسرقة التوزيع لحودة بندق

اتهمت المطربة شيراز حسنى موزع أغنيتها "أنا مش مامتك" التي طرحتها عام 2018، بسرقة نفس التوزيع لأغنية "عيشها بمزاج" للمطرب حودة بندق.

وعلقت شيراز على صفحتها الفيس بوك قائلة: رغم أني اتعرضت لمواقف كتير وحشة منهم نصب وسرقة وعقود احتكار عطلتني كتير وقعدتنى في البيت، لكن دايما كنت بحل أمورى بهدوء ولأني مابحبش وجع الراس كنت كتير بعدى وافوت، بس تقريبا في كتير افتكرو أني هبلة وبسكت عن حقي فقالو يتمادو.

وأضافت: المهم مع احترامي للفنان جاد شويري والفنان حودة بندق، والملحن مدين اللي ملحنلي الغنوة واللي رشح الموزع للغنوة، إلا أن عيب على موزع محترم أخد حقة المادى انه ياخد توزيع عامله وواخد تمنه لمطربين تانيين لاء ولانه عارف انه عامل حاجة غلط عمل ليا بلوك، اتفاجأت بناس بتكلمنى وتبعتلي رسايل تقولي الغنوة بتاعتك التوزيع مسروق ومعمول لغنوة تانية، دخلت اشوف لاقيت ان الموزع اللي وزعلي الغنوة، هو اللي وزع ولحن الغنوة التانية، بجد برافو علي الابداع.

واستكملت حديثها قائلة: بس ياريت ماتتريقوش علي فنانيين المهرجانات وتتهموهم بالسرقة وتقللو منهم وكأنهم شيء حقير وانتو اصلا بتعملو اللي بيعملوه برافو عليكم، اللي هو أنا أسرق عادى لكن اتسرق لاء اقلب الدنيا، وانا سيبلكم جزء من اللي اتاخد من الغنوة الحكم ليكم.