بعد سخريتها من حسن أبو السعود.. بهاء الدين محمد يدافع عن شيرين

دافع الشاعر بهاء الدين محمد على النجمة شيرين عبدالوهاب بعد الهجوم الذي شن عليها خلال الساعات الماضية بعد تنمرها على الموسيقار الراحل حسن أبو السعود، وذلك خلال مداخلتها الهاتفية مع الإعلامية لميس الحديدي ببرنامجها "كلمة أخيرة".

وعلق عبر صفحتة الشخصية على الفيسبوك بمنشور يستدعي فيه ذكرياته مع الملحن الكبير الراحل حسن أبو السعود ويدافع فيه عن الفنانة شيرين عبدالوهاب، قائلاً: "حبيبى اللى عمرى ما حسيت أنه مش ف الدنيا واللى كل الوسط بيحبه وكان وجوده في أى مكان بيعمل حاله من البهجة بروحه الطيبة وقلبه اللى كله حب وفن".

وأضاف: الفنان اللى عملنا مع بعض نجاحات عايشه لحد النهاردة ومنها أغنيات أسف حبيبتى ولما النسيم وفى ناس وأصعب حب ووعدا الليل وعمال يحكيلى عنها، ومئات الأغانى اللى كان بخبرته في اللايف بيعرف يجيب الجملة اللى الناس تحبها وبالفعل سيطرنا سنين على الساحة الغنائية وغيرنا كتير، ده غير أنه كان من أفضل العازفين على الأوكرديون في العالم.

واستكمل حديثه: وفي يوم من الأيام وهو نايم تعبان لقيته إبتسملى وسألنى أنت عارف مين أكتر حد حيزعل عليا لما أموت؟ قولتله إسم من أسماء ولاده، قالى لأ أنت أكتر حد حيزعل عليا وبالفعل أنا مابقيتش حتى أمشى من شارع بيته وفضلت فترة طويلة أنسا أنه مات لأنه عشرة فن وحياة، وكان بيحبنى كأنى إبنه وكان بيفرحلى بكل نجاح حتى لو مش معاه وحأبقى أحكيلكم إزاى إتقابلنا لأن الموضوع ده مهم.

وأوضح بهاء قائلاً: والمهم علشان أقول اللى ضميرى بيحسه ف موضوع شيرين عبدالوهاب واللى جهات كتير عايزنى أقول رأى في كلامها عنه أو وصفها أنا بكل صراحة بأقول ماحستش أنها قاصده تهينه ولا تسخر منه هى بس إستدعت سيرته بشكل يبدو ساخر لكن أنا رغم إنى متضايق منها وهو عندى من أغلى الناس إلا إن إحساسى قالى إنها ماتقصدش، لأن فعلا لما كنا بنتقابل كان بيحتفل بشيرين وبيحب فنها والبساطه اللى فيها وهى كانت بتحبه وتحترمه.

وفي نهاية حديثه قال: وللعلم أنا لما كنت بأروحله وشبعان ومش طايق أشوف أكل أول ما يقولى تاكل بأداء ماشوفتش زيه بألاقى نفسى بأجوع، الله يرحمه كان فنان ودمه خفيف وقلبه قلب طفل، بس هى غلطانه إنها بتطلع تتكلم، ولو ليا سلطة عليها مش حأخليها تنطق لا على مسرح ولا لقاء ولا حتى ف حياتها الشخصية.. أسكتي يا شيرين.