سارة نخلة عن السخرية من صورة ياسمين عز: «ناس حقودة وغلاوية»

دافعت الفنانة سارة نخلة عن المذيعة ياسمين عز بعد الهجوم الذي تعرضت له عبر السوشيال ميديا، وتداول البعض صورة قديمة لها قبل الشهرة، وعلقوا عليها «الفلوس بتغير».

وكتبت سارة نخلة عبر حسابها الرسمي على «فيسبوك» : «أي حد فينا لو جبناله صور من عشر سنين وصور دلوقتي أكيد أكيد الشكل هايفرق تماما، مش بس عشان تجميل أو مكياج لا طبعا في عوامل كتير منها طريقة التصوير ونوع الكاميرا والموضة، ساعتها كانت غير دلوقتي تماما وطريقة الشعر كانت مختلفة والعمر لوحده عامل كبير جدا، أكيد الناس بتتغير وأكيد الشكل بيتغير والبشرة بتتغير».

وأضافت: «برأيي الناس الي بتجيب صور قديمة لأي شخصية مهما كانت وأقولك بص الفلوس بتعمل إيه، دي اكتر ناس حقودة و غلاوية شوفتها فحياتي، أول أكتر ناس تتمنى يبقى عندها القدرة  على التغيير ومش عارفة، تلاقيها أصلا من عشر سنين ما حركتش ساكن فحياتها ومش عارفة تبتدي منين ونفسها بجد من جوا أنها تتغير و مش عارفة أو مش قادرة ،الحقد و الغل دا بيقتل صاحبه و عمره ما يأثر على حد».

وتابعت: «أنا من الناس الي بجد لما بشوف صوري من عشر سنين طب ولله حتى من سنتين حتى بقول لنفسي براڤوووو و معنديش مشكلة خالص».

واستكملت: «اياكو تفتكروا ان كلامكو دا هايأثر بالشخص الي بتتريقوا عليه خالص، دا دليل قهر و زعل انكو مش عارفين توصلوا و تبقوا زيها، جاتكو القرف ناس غلاوية ما تلتهوا بنفسكوا و توفروا طاقتكو لنفسكو و حاولوا اعملوا تغيير ينفعكو، وما تنسوش الكارما، كل حاجة هاتتردلكو و لو مش ليكو هتلاقوها فعيالكو، داين تدان».