أيمن نور الدين يُطالب بإجراء تحليل مخدرات لـ حسام حبيب
كتب: مؤمن نصر
علق الكاتب الصحفي أيمن نور الدين، رئيس تحرير جريدة وموقع العاصمة، على الأزمة التي تعرضت لها النجمة شيرين عبد الوهاب خلال الساعات الماضية، واحتجازها بمستشفى النزهة بمصر الجديدة للعلاج.
وقال أيمن نور الدين عبر حسابه الشخصي على «فيسبوك»: «خربتها ياحسام؟، ارتحت ياحسام ياحبيب دلوقتى؟، هديت لما أخوها فضح كل حاجه وقال اللى مكناش قادرين نقوله من سنين كصحفيين حتى لا نقع تحت طائلة القانون؟، وعمالين نكتب فى مقالتنا عقاقير ومش عقاقير وأحنا عارفين حتى الديلر اللى بتقضى من عنده شيرين، أديك دمرتها ودمرت سمعتك بزيادة وبقى منظرك زى الز...فت دلوقتي».
وأضاف: «مسحت احترام الناس ليك بأستيكة وبدل ما تركز في شغلك وأغانيك بقى منظرك زبالة، بقيت جوز الفنانة القبيض والمدمن اللي عايز يمص دمها وكأنها فريسة، وبقى اللي رايح واللي جاي عارف أن كل تفكيرك في الفلوس، وأنك كل...ب فلوس، خدت منها العربية قبل كده وفلوس بالهبل أنت وعيلتك، وحتموت ترجعها عشان تاخد منها العربية تاني والفيلا وكل اللى حيلتها، وتخلبها شوية وبعدين تجيبها عالبلاط و ترجع ترميها زى الكل...بة».
واستكمل: «مين يصدق أن شيرين حاليا أخوها هو اللي بقى بيصرف عليها وبيدفعلها فلوس المستشفى وأنها معهاش فلوس حتى الشقة اللي أجرتها في التجمع عشان تقابلك فيها أنت وصحابكوا وتتعاطوا المخدرات بعيد عن عيون أخوها وأمها، مكانش معاها فلوس تدفع إيجارها، مين يصدق أنك أنت والمخدرات خلوا شيرين عالحديدة، وبسببك شيرين عبد الوهاب بقت محجوزة بشكل علني في مستشفى بتتعالج من الإدمان».
وأوضح "نور الدين": ياعالم حتفوق لنفسها ولعيالها أمتى ولا حتخرج من المستشفى وتتعاطى تاني لغاية ماينتهي بيها الحال زى ناس كتيرة قبل كده فنانين وغير فنانين، ارتحت خلاص؟ لما أمها الست اللي فوق التمانين سنة قاطعت أصحابها بسبب سمعة بنتها المدمنة، وبقت عايشه في عذاب ومنهارة وبتصرخ انقذوا بنتي، وأن بناتها بدل ماكانوا بيتشرفوا بأمهم قبل ماتعرفك، كرهوا المدرسة من الفضيحة ومن كلام زمايلهم عليها، خربتها ياحسام؟ أهى شيرين بقت لا قادرة تراعي بناتها ولا تراعى نفسها ووصل بيها الحال للمستوى دة.
وأشار قائلاً: أنا معاك ياحسام أن شيرين نفسها شريكة معاك في الجريمة وأنها تستاهل كل اللي جرالها وعلى رأي اللي قاللي أن شيرين مافكرتش في كل النعم اللي ربنا أدهالها وراحت تبوظ كله في الوقت اللي فيه أمهات تانية بتطفح الكوتة عشان خاطر ولادها، وأنها بعد كل اللي جرى ده وتبوس أيد الدكتور قدام الناس كلها وتقول ده اللي عالجني وتقول خلاص حركز في شغلى وفني راجعه تتعاطى تاني وكأن شيئا لم يكن، كإن معندهاش مخ خالص ولا هاممها حاجة، والغريبة ياحسام أنها كل ماترجعلك.. ترجع للمخدرات تاني تقولشي أنت بتقضي صنف أحلى.
وألمح قائلاً: أنت بتستولى على إرادتها بالمخدرات مش بالحب الحقيقي لأنك ضامن أنها كل ما حترجع تشرب حترجعلك، ولما بتشفى من الإدمان بتشفى منك وتبعد عنك، أنت بالنسبالها بقيت أنت والمخدرات حاجه واحدة، أنتوا الاتنين مضرين ومميتين، الشهادة لله نفسي النيابة تقرر أنهم يعملولك تحليل مخدرات، وبطالب أى مسئول في البلد أنه يدفع في الاتجاه ده، ماهو حرام بصراحة بعد كلام أخو شيرين ما يتعملكش تحليل مخدرات وتتمسك، حرام العيال الغلابة يتمسكوا بسيجارة بانجو وأنت واللي زيك شغالين تعاطي في حاجات أغلى وأخطر بكتير ومتسابين كدة.
وأضاف: «أنا بصراحة متعاطف مع أخوها.. حتى لو ليه مصلحة أهو أسمه أخوها برضه، وعلى الأقل عايز أخته تخف من الإدمان وترجع لشغلها مش زي حسام اللي أول ما بيرجعلها بترجع للشم تاني، صحيح أخوها هو اللي فضح الدنيا وكشف إدمان أخته النجمة الشهيرة قدام الدنيا وجاب عاليها واطيها، لكن هو مالقاش حل تاني عشان ينقذ شيرين وينقذ نفسه من العصابة، مكانش فيه حل تاني، ساعات الكي بالنار رغم ألمه.. هو اللي بيشفي، المخدرات مصيبة ومالهاش حل مين يصدق أن شيرين وصل بيها الحال أنها تطرد أمها من البيت ولا يفرق معاها عيالها، وده طبعا بسبب الإدمان اللي عاميها عن كل حاجة».
واختتم قائلاً: «شيرين نجمة مصرية كبيرة وخسارة تبقى نهايتها هو الإدمان والانتحار، أوقفوا حسام حبيب وأعملوله تحليل مخدرات وكفاية مهزلة، وباعتقد أن مصطفى كامل نقيب الموسيقيين الجديد لازم يكون ليه موقف ما مع حسام حبيب كعضو في النقابة، نضف نقابتك يا مصطفى من المدمنين، وربنا يشفي شيرين واللي زيها في الوسط ودول كتير ويرجعلها عقلها تاني».
