زاهي حواس: «السياح بيشتكوا من إذاعة الأذان بمكبرات الصوت»
كتب: شروق خالد
أكد الدكتور زاهي حواس عالم الآثار المصري، أنه هناك بعض الممارسات تحدث في مصر يجب تعديلها من أجل جذب السياحة، مشيرًا إلى أن إذاعة الأذان بمكبرات الصوت يزعج السياح، ولا يوجد ذلك في أي مكان غير في مصر.
وأوضح «حواس» أن هناك سلوكيات يفعلها بعض المواطنين تسبب في مضايقة السائح، بقوله: «لازم نعمل مادة لطلبة المدارس عن السياحة، عشان يعرفوا يتعاملوا مع السائح، مش ممكن واحدة تبقى ماشية في الشارع بالغردقة وحد يقرصها، أو واحد بتاع بزار يقولك اتفضل ويشدك غصب عنك، أو واحد بتاع تاكسي تمنه 30 جنيه يقولك 50 دولار، ده بيحصل، وعيب».
وتابع: «الشرطة مش هتقدر تعمل حاجة مع هذه السلوكيات، الموضوع موضوع ثقافة، لازم الشعب يعرف إن كل واحد فيه هو وزير السياحة».
واستطرد: «عاجبني إبراهيم عيسى لما اتكلم على موضوع الأذان، ما يتعمل جوه المسجد، وليه 70 أذان؟! أنا مرة نمت في مينا هاوس عندي محاضرة تاني يوم، قمت على صوت الأذان بيقوم السياح اللي قاعدين، مضيفًا: «مفيش في الدين يقول إن يعمل الأصوات دي كلها، إحنا دولة سياحية ولازم نحافظ على راحة السائح، في حاجات لازم نبطلها عشان نجيب السائح».
واختتم عالم الآثار المصري حديثه بقوله :«ليه الأذان اللي بره الجامع؟! أعمل الأذان اللي جوه، وأي حد متدين ميقولش أزعج الناس، ده إزعاج للناس، أنا عارف ميعاد الصلاة أروح أصلي في الجامع، ده شكوى بيشتكي منها السياح، ومش موجود في أي حتة في الدنيا غير عندنا»، وجاء ذلك خلال استضافته مع الإعلامي حمدي رزق ببرنامج «نظرة» عبر قناة صدى البلد.
إقرأ أيضًا: زاهي حواس: «طردت بيونسيه من الأهرامات بسبب غبائها»
