غادة عبد الرازق: «أنا خجولة.. والرجالة لازم يتقبلونا زي ما إحنا كده»
كتب: نسرين إبراهيم
أثارت النجمة غادة عبد الرازق، جدلاً واسعًا خلال الساعات الماضية، عقب تداول تصريحات تلفزيونية جديدة لها.
وكشفت غادة عن الكثير من أسرار حياتها الشخصية، ورأيها في علاقة المرأة بالرجل، كما تطرقت لأعمالها الفنية المقبلة.
ويرصد "العاصمة" من خلال السطور التالية، أبرز تصريحات غادة عبد الرازق التي أثارت جدلاً في الساعات الماضية.
ـ أنا مش بعرف أقف قدام الكاميرا غير وأنا بمثل ومش بحب الظهور كتير.
ـ الناس بتفتكر إني مش خجولة، بس أنا خجولة جدًا وساعات لما ببقى ضيفة في البرامج ببقى حادة في كلامي وطريقتي وده بيضايقني جدًا ومش بيعجبني وبفضل أني اظهر قدام الكاميرا في الشغل بس.
ـ أنا اتغيرت جدًا الفترة الأخيرة ومبقتش أخد الحاجة على نفسي وبفكر في الحاجة اللي تنفعني وتنفع جوزي وبنتي وأحفادي والتيم بتاعي في الشغل، أنا مبقتش متهورة ومتسرعة زي الأول، وبقيت أسمع الكلام ومبسوطة إني عرفت أحجم حاجات كتير في شخصيتي.
ـ الست محتاجة اللي يحبها ويدعمها ويفهم أفكارها ولو أفكارها غريبة يستحملها لغاية ما يغير أفكارها ومنقفلهاش على الوحدة، وأنا شايفة إن لو الست مش موجودة مكنش هيبقى في كون، ولازم الرجالة يتقبلونا زي ما إحنا كده.
ـ أتمنى الصناعة في السينما ترجع زي زمان والستات ترجع تعمل بطولات مطلقة، ومتبقاش النجومية محددة في إن البطل يبقى قدامه بطلة وحابة الأفلام يتعمل فيها نجوم كتير.
ـ الست بتواجه تحديات كتير في السينما المصرية، وبيدوهم مساحة أقل في الأعمال ومش بيحبوا يكرروا التجربة، ولو في فيلم جايب إيرادات قليلة مش بيحبوا يجازفوا تاني وبيشوفوا أن البطل هو السبب وهو اللي مجذبش الجمهور بس ممكن يكون في عناصر تانية السبب اللي مجذبتش الجمهور زي السيناريو أو التصوير أو اي حاجة تانية مش لازم الفنان.
ـ أتمنى نعمل أفلام هادفة زي باب الحديد وجعلوني مجرما، ويبقى ليها هدف ومسلية في نفس الوقت، والجمهور ميبقاش حاسس أنهم بيتفرجوا على حاجة تديهم معلومة غصب عنهم.
ـ أنا عايزة نرجع نعمل أفلام زي الأبيض والأسود، لأنها مبقتش موجودة في الوقت الحالي.
ـ كنت بعمل مسلسلات بتتكلم شوية عن المرأة وبأخد حقي، بس الجمهور متقبلش مني ده.. لكن كل اللي حابة أوضحة إن النقاد زقوني لكده وقالولي إنتي مش هتفضلي تطلعي في كل المسلسلات بتأخدي حقك والنس كلها تحبك.
ـ لسه مخلصة فيلم كوميديا وهينزل في إجازة نص السنة وأنا بقالي كتير معملتش كوميدي وكان معايا كوميدينات كتير وكنت بخاف معرفش أقول الإفيه أو يبقى دمي تقيل لأني بعيدة عن الكوميديا بقالي كتير بس كانوا بيشجعوني في التصوير.
