فريدة سيف النصر عن منة شلبي: كلنا بنغلط وهي محتاجة حب الجمهور

دعمت الفنانة فريدة سيف النصر، الفنانة منة شلبي فيما تمر به من أزمة بعد توجيه تهمة تعاطي المخدرات لها، ووجهت على أثر ذلك رسالة للجمهور، من خلال حسابها الرسمي بموقع التواصل الاجتماعي، فيسبوك.

وقالت فريدة سيف النصر:"منة شلبي... منة الله قلبي عندك يابنتي.. كل ما اقرأ خبر.. لنا الرحمة والرأفة منك يارب.. البوست بيسألك إيه اللي في عقلك علشان نكتبه.. الحقيقة هو مش في عقلي هو في قلبي وروحي وماعرفش اسكت طبيعتي كده خلقة ربي وتربية لوزه أمي.. الأول هاطلب منكم الجدعنة المصريين جدعان والكلمة بتأثر بيسموها الرأي العام والسؤال.. الفنان لما يبقي في محنة بيحتاجكم أوي أنتم عملتوه بعد ربنا وهو بيبقي على أعصابه خايف تزعلوا عايز يرضيكم.. فهطلب منكم بلاش قسوة وحياة سيدنا النبي معلش.. افتكروا لنا أي مشهد ضحككم وإنتم زعلانين أو رواية كانت واقعية كأنكم عيشتوها.. خلوا الحب اللي كان جواكم يهدي مايثورش".

وأضافت: "أيوة بنغلط كلنا بنغلط إحنا بشر فينا اللي بيكمل غلط وفينا اللي بيرجع من أولها وفينا اللي بينصحوه غلط ويغرقوه منهم لله.. وفينا اللي قدوته بهدلته وعقدته ومش شايف حياته الحلوة لأن جواه حياة شافها يتمنى إنه مايفتكرهاش بس مابيقدرش.. ومش بيصدق إن الناس بتنسى.. هو شايف نفسه اللي عارفها هو بس.. أكيد كلنا جوانا حاجة فيها آلام وذكرى مش عايز يفتكرها ولا حد يفكره بيها.. فما بالك لو فنان مشهور نصيبه كده أو نصيبها:.

وتابعت: "ماتبصوش على الابتسامة.. بصوا جوه العين في مشاعر صعبة مكتومة تخلي العين دامعة وتفهمها وفي عين باردة بلا تعبير لكن تدعي التعبير.. العين دي مش شايفة الناس بتبص لها ازاي بإعجاب وحب هي شايفة فقط حالة ماكانتش تتمنى تكون هي دي حياتها ولا تقدر تتخلى في نفس الوقت عن أقرب الناس.. مشاعر متضاربة تحسسه بأنه قليل وهو مايعرفش أنه بقي مهم وماضيه مايهمش حد.. الصراع ده بيخليه يهرب.. فبيهاجر.. فبيغير كل اللي حواليه ويبدأ من جديد.. وفي اللي صحاب السوء يقولوا له زي أفلام زمان خد لك كاسين تنسى.. أو نفسين وكبر دماغك منهم لله شياطين الإنس".